मलेठ घटनाको ६ बर्षपछि ओली सप्तरीमा

१५ असोज, जनकपुरधाम । सप्तरीको मलेठमा ५ जनाको मृत्यु भएको घटनाको ६ बर्षपछि नेकपा एमालेका अध्यक्ष केपी शर्मा ओली सप्तरी आएका छन् ।

शनिबार जिल्लाको कंचनरुप नगरपालिकामा आयोजना गरिएको आमसभालाई सम्बोधन गर्न ओली यहाँ आएका हुन् ।

यसअघि २३ फागुन २०७३ मा एमालेको मेची महाकाली अभियान अन्तर्गतको कार्यक्रमका लागि ओली सप्तरी आएका थिए । मलेठस्थित औद्योगिक क्षेत्रमा एमालेले अभियानको कार्यक्रम गर्न खोज्दा तत्कालिन मधेशी मोर्चाले अवरोध गरेको थियो ।

मोर्चाको अवरोधकाबीच एमालेले कार्यक्रम गरेको थियो । एमाले र मधेशी मोर्चाका कार्यकर्ताबीचको सम्भावित झडप रोक्न खटिएको प्रहरीले गोली चलाउँदा ५ जनाको मृत्यु भएको थियो ।

कुर्ता पाइजामा लगाएर आएका ओलीले घाँटीम गम्छा पनि बेरेका छन् । आमसभामा बिभिन्न पार्टीका नेताहरु प्रवेश गर्ने कार्यक्रम समेत रहेको एमाले, सप्तरीले जनाएको छ ।