७७ लागे नीर शाह, अमेरिकामै मनाउँदैछन् जन्मदिन

काठमाडौं । नेपाली फिल्म, संगीत र टेलिभिजन क्षेत्रका चर्चित व्यक्तित्व नीर शाह आज (बुधबार)देखि ७७ वर्ष लागेका छन् । एक फिल्म अवार्डको सिलसिलामा अमेरिकाको डेनवर प्रस्थान गरेका शाहले बुधबार त्यहीं आफ्नो जन्मदिन मनाउँदैछन् ।

नेपाल टेलिभिजनको संस्थापक अध्यक्ष समेत रहेका शाहलाई सामाजिक सञ्जालमा जन्मदिनको शुभकामना दिनेको ओइरो छ । उनको तस्वीर पोस्ट गर्दै सेलिब्रिटीले शाहसँगका किस्सा सम्झिएका छन् ।

शाहले अभिनय गरेको पहिलो नेपाली फिल्म ‘परिवर्तन’ हो । कुसुमे रुमाल, प्रेमपिण्ड, नाता रगतको, ढुकढुकी, बादलपारि, सिउँदोको सिन्दूर, गौंथली, जीवनसाथी, बाचा बन्धन, मुनामदन, सानो संसार, किस्मत लगायत उनी अभिनित हिट फिल्म हुन् । शाहले बासुदेव, पच्चीस वसन्त, वसन्ती, राजमती, सेतो बाघ लगायत फिल्म निर्देशन गरेका छन् ।

उनले लेखेका गीत पनि निकै चर्चित छन् । नारायणगोपालले गाएको ‘पर्खिबसें आउला भनी’, फिल्म स्वर्गको ‘छोरी मलाई भागी भागी नसताऊ’, प्रकाश श्रेष्ठले गाएको ‘गहिराइमा डुब्दै नडुब’, फिल्म वसन्तीको ‘प्यारी वसन्ती’ लगायतका उनले रचेका चर्चित गीत हुन् ।

नेपाली फिल्ममा उनलाई ‘भीष्म पितामह’ पनि भन्ने गरिन्छ । उनी निकटकाले शाहलाई ‘नीर राजा’ भनेर सम्बोधन पनि गर्छन् । राजनीतिक रुपमा पनि शाह सक्रिय छन् । नेकपा माओवादी केन्दै हुँदै उनी यतिबेला नेपाली कांग्रेसमा आबद्ध छन् । उनी राष्ट्रियसभामा मनोनित हुने समेत केही समयअघि चर्चा थियो ।

यो पनि पढ्नुहोस

नीर शाहले आफ्नी छोरीलाई हेरेर कथेका थिए, ‘तिम्लाई बाबाको माया कति लाग्छ रे ..’

यतिबेला शाह अर्का वरिष्ठ निर्देशक तुलसी घिमिरेसँग मिलेर कृतिमा आधारित फिल्म ‘कोही किन बर्बाद होस्’को निर्माणमा व्यस्त छन् । त्यसबाहेक ‘छक्कापञ्जा’सहितका अन्य केही फिल्ममा पनि उनले अभिनय गर्दैछन् ।

नेपालबाट पहिलोपटक ओस्कार अवार्डमा मनोनित भएको फिल्म हिमालय (क्याराभान)का उनी लाइन-प्रोड्युसर समेत हुन् । फिल्म सौन्दर्यको ज्ञान र क्रिटिकल विश्लेषणका धनी समेत रहेका शाहले फिल्मसम्बन्धी अध्ययन हुने ओस्कार कलेजको समेत स्थापना गरेका थिए ।

आजसम्म पनि नेपाली फिल्म क्षेत्रमा सक्रिय रुपमा लागिरहेका निर्माता, निर्देशक तथा अभिनेता शाहलाई जन्मदिनको शुभकामना ।