धनराज गुरुङ : सकसपूर्ण पहिलो संसदीय प्रतिस्पर्धामा

समानुपातिकतर्फबाट दुवै संविधानसभामा पुगेका नेपाली कांग्रेसका धनराज गुुरुङ आसन्न प्रतिनिधिसभा निर्वाचनमा स्याङ्जा-२ बाट उठेका छन् । कांग्रेसको केन्द्रीय उपसभापति समेत रहेका उनी विरुद्ध नेकपा -एमाले)की सचिव पद्मा अर्याल चुनावी मैदानमा छिन् ।

५७ वर्षीय गुुरुङ स्याङ्जा-१ का स्थायी बासिन्दा हुन् । आफ्नो गृह क्षेत्रमा पकड कमजोर रहेकाले उनले क्षेत्र नम्बर २ रोजेको स्याङ्जाका कांग्रेसजनहरू बताउँछन् ।

गुरुङ पक्षका नेता-कार्यकर्ताले उनलाई यसपटक प्रदेश सभामा उम्मेदवारी दिएर मुुख्यमन्त्री बन्न सुुझाएका थिए । तर, उनले संघ नै रोजे । दुई पटक समानुुपातिक सांसद बनेका गुुरुङले पहिलोपल्ट जनताबाट अनुमोदित हुने आँट कसेका हुुन् ।

२०२२ सालमा स्याङ्जाको अर्जुन चौपारीमा जन्मिएका धनराज गुुरुङ १४ वर्षकै उमेरमा विद्यार्थी आन्दोलनबाट राजनीतिमा आएका थिए । १६ वर्षकै उमेरमा उनी नेविसंघ इकाई सभापति भए ।

२०४० सालमा नेविसंघ स्याङ्जा जिल्ला सचिव बनेका उनी २०४३ मा पोखरा पृथ्वीनारायण क्याम्पसमा पढ्दा पनि नेविसंघको राजनीतिमा सक्रिय रहे । २०४८ सालमा नेविसंघको केन्द्रीय उपसभापतिमा निर्वाचित उनी त्यही साल पार्टीको महाधिवेशन प्रतिनिधि पनि भए । उनी २०५३ सालमा नेविसंघको केन्द्रीय सभापति र २०५४ मा नेपाल तरुण दलको महासचिवमा निर्वाचित भए ।

त्यसपछि पार्टीको १२औं र १३औं महाधिवेशनबाट केन्ऽीय सदस्य बनेका धनराज गुरुङ १४औं महाधिवेशनबाट उपसभापतिमा निर्वाचित भए । उनी कांग्रेसभित्र डा. शेखर कोइराला गुटमा छन् ।

स्याङ्जा-२ को चुुनावी अंकगणित

गत वैशाखको स्थानीय चुनावमा वडाअध्यक्षका उम्मेदवारहरूले पाएको दलगत मतको आधारमा स्याङ्जा-२ मा नेपाली कांग्रेस पहिलो पार्टी हो । उक्त चुनावमा कांग्रेसले ३६ हजार ८०६, एमालेले ३४ हजार ८०९ र नेकपा (माओवादी केन्द्र)ले एक हजार ४४७ मत पाएका छन् ।

त्यस्तै, मंगोल नेशनल अर्गनाइजेसनले ६४८, राष्ट्रिय प्रजातन्त्र पार्टी (राप्रपा)ले ५११, नेकपा (एकीकृत समाजवादी)ले २३३ र स्वतन्त्रले ५९० भोट पाएका छन् ।

यो चुनावी अंकगणितले सत्ता गठबन्धनका साझा उम्मेदवार धनराज गुरुङलाई तुलनात्मक रूपमा बढी सहज अवस्थामा देखाउँछ । अघिल्लो निर्वाचनमा कांग्रेसका गोपालमान श्रेष्ठलाई ३ हजार ७०६ मत (३१ हजार ४३६ विरुद्ध ३५ हजार १४२) ले पराजित गरेकी वाम गठबन्धनकी उम्मेदवार पद्मा अर्याल यसपटक एक्लो एमालेको बलमा हुनु पनि उनको लागि सहजता भएको छ ।

यद्यपि, गठबन्धनका अन्य दलको मत कम भएको र प्रतिस्पर्धी धेरै रहेकाले उनी सुरक्षित भने छैनन् । राष्ट्रिय स्वतन्त्र पार्टीका टिकराज गुरुङ लगायत उम्मेदवारहरूको सम्भावना हेर्दा धनराजले गठबन्धनको मत जोगाएर मात्र जित्ने सम्भावना देखिन्न । कांग्रेसमा कोइराला गुटका उनलाई पार्टीभित्रकै पनि सबै मत सुरक्षित गर्ने चुनौती छ ।

यो पनि पढ्नुहोस

पद्मा अर्याल : प्रभाव जोगाउन जित्नैपर्ने दबाब, प्रतिकूल अंकगणित