सरकार बनाउन अवाञ्छित काम गर्दैनौं : गोकर्ण विष्ट

३ पुस, काठमाडौं । नेकपा एमाले का सचिव गोकर्ण विष्टले आफूहरु सरकार निर्माणका लागि अवाञ्छित गतिविधिमा नलाग्ने बताएका छन् ।

आइतबार बुटवलमा पत्रकारहरुसँगको कुराकानीमा सचिव विष्टले एमालेले प्रतिपक्षमा बस्ने जनमत पाएकाले जनमत विपरीत सरकार निर्माणको अवाञ्छित काममा नलाग्ने बताएका हुन् ।

‘हामी सरकार निर्माणको लागि अवाञ्छित गतिविधि गर्ने गैरसंसदीय, गैर लोकतान्त्रिक, अवाञ्छित, अशोभनीय काम गरेर सरकार निर्माण गर्ने प्रयत्नमा अल्झिदैनौं’ उनले भने ।

सचिव विष्टले एमालेलाई कमजोर बनाउन गत निर्वाचनमा वामपन्थीहरुले दक्षिणपन्थी शक्तिसँग गठबन्धन गरेका बताए । उनले नेकपा माओवादी केन्द्र, नेकपा एकीकृत समाजवादी र राष्ट्रिय जनमोर्चामा वैचारिक विचलन देखिएको दावी गरे ।