पक्राउ परेका २ सैनिकलाई अदालत हाजिर गराउने आदेश बुझ्न सेनाको आनाकानी

१८ फागुन, काठमाडौं । नेपाली सेनाका उपरथी प्रेम शाहीलाई सहयोग गरेको भन्दै पक्राउ परेका दुई सैन्य अधिकारीबारे सर्वोच्च अदालतले दिएको आदेश जंगीअड्डाले बुझ्न आनाकानी गरेको छ ।

शाहीलाई सघाएको आरोपमा पक्राउ परेका प्राड विवाकका प्रमुख सेनानी कुलदिप तिमसिना र महासेनानी महेन्द्रजंग शाहलाई तीन दिनभित्र उपस्थित गराउन बुधबार सर्वोच्च अदालतले आदेश दिएको थियो ।

न्यायाधीश हरि फुयाँलको इजलासले म्याद सूचना प्राप्त भएको मितिले ३ दिनभित्र महान्यायाधिवक्ताको कार्यालयमार्फत बन्दस्हित लिखित जवाफ पेश गर्न भनेको थियो ।

बिहीबार सर्वोच्चको आदेश दर्ता गर्न पुगेका अदालतका कर्मचारी र आफन्तलाई जंगीअड्डाको दर्ता शाखा पुगेका छन् । तर, सेनाले आदेश दर्ता गर्न नमानेको एक आफन्तले बताए ।

‘यो आदेश भन्ने वित्तिकै दुई जनाले कर्मचारी बैठकमा गएको भनेर तीन घन्टाभन्दा बढी कुराइसके’, उनले अनलाइनखबरसँग भने, ‘दर्ता गर्ने कर्मचारी जति सबै यसरी तीन घन्टासम्म कसरी जान्छन्, अचम्म लागेको छ ।’

सैनिक सूचना तथा जनसम्पर्क निर्देशनालयका प्रमुख कृष्णप्रसाद भण्डारीले एउटा सरकारी निकायले पठाएको चिठी अर्कोले नलिने भन्ने नहुने बताउँदै यसबारे के भएको थाहा नभएको सुनाए । ‘कसले कहाँ लिएर आयो ? भन्ने जानकारी भएन’, उनले भने ।

शाह सेनाको मानवअधिकार निर्देशनालयमा कार्यरत अधिकृत हुन् भने तिमसिना पूर्व पृतना प्राड शाखा कार्यालयमा कार्यरत थिए । बुधबार जंगीअड्डा बोलाइएका उनीहरुलाई उपस्थित हुने वित्तिकै नियन्त्रणमा लिइएको थियो । केहीअघि उनीहरुको मोबाइल समेत खोसिएको थियो ।

सेनाले दुवै जनालाई पक्राउ गरिएको समेत स्वीकारेको थिएन । तर, साँझ उनीहरुलाई हिरासतमा राखिएको छ । पक्राउ परेलगत्तै गैरकानूनीरुपमा थुनामा राखिएको भन्दै दुवै सैनिक अधिकृतले सर्वोच्च अदालतमा बन्दी प्रत्यक्षीकरणको रिट दिएका थिए ।

यो पनि पढ्नुहोस

नेपाली सेनाले पक्राउ गरेका दुई सैनिकलाई उपस्थित गराउन सर्वोच्चको आदेश