६ चैत, विराटनगर । चैत ९ गतेदेखि हुने विराट गोल्डकपको तयारी पूरा भएको छ ।
चैत ९ गतेदेखि १७ गतेसम्म सञ्चालन हुने प्रतियोगिताको तयारी लगभग पूरा भएको हो । प्रतियोगितामा आयोजकसहित ८ टोली सहभागी हुने आयोजक विराट गोल्डकप ट्रष्टले जनाएको छ ।
शहीद रगशाला विराटनगरमा आयोजना हुने प्रतियोगितामा नेपालका तीन विभागीय टोली एपीएफ, त्रिभुवन आर्मी, नेपाल पुलिस क्लब सहभागी हुनेछन् । त्यस्तै संकटा क्लब, जवालाखेल युथ क्लब र घरेलु टोली विराटनगर सिटी फुटबल क्लब सहभागी हुनेछन् ।
भारतमा जारी आई लिगको दोश्रो डिभिजन खेलिरहेको दिल्ली एफसी र केरलामा रहेको लुका सकर क्लब सहभागी हुने तयारी थियो । तर अन्तिमसमयमा दिल्लीले नाम फिर्ता लिएको छ । दिल्लीको ठाउँमा डुक लयुल फुटबल क्लब भुटान सहभागी हुने छ ।
गोल्डकपको विजेताले २० लाख १५ हजार पुरस्कार पाउनेछन् । उपविजेताले १० लाख १५ हजार पुरस्कार प्राप्त गर्नेछन् । गत सिजन विजेताले १५ लाख १५ हजार र उपविजेताले ७ लाख ५१ हजार पुरस्कार पाएको थियो ।
२०१८ सालमा विराटनगर पहिलो पटक गोल्डकप सुरु भएको थियो । २७ औं संस्करणसम्म महेन्द्र गोल्डकपको रुपमा आयोजना गरिएको एन्फा उपमहासचिव बसन्त अर्यालले जानकारी दिए । २०६८ सालमा नाम परिवर्तन गरि विराट गोल्डकप राखिएको थियो । नाम परिवर्तन भएपछि सातौं पटक विराट गोल्डकप आयोजना गर्न लागिएको हो । प्रतियोगिता गर्न २ करोड ५० लाख खर्च हुने विराट गोल्डकप ट्रष्टले जानकारी दिएको छ ।
प्रतिक्रिया 4