स्वर्णिमलाई गगनको कटाक्ष : तिमी त पेन्सन पकाएको, म जागिर नखाई सडकमा लडेको

२० चैत, काठमाडौं । नेपाली कांग्रेसका महामन्त्री गगनकुमार थापाले कांग्रेस छाडेर राष्ट्रिय स्वतन्त्र पार्टी (रास्वपा)बाट चुनाव लडेका स्वर्णिम वाग्लेमाथि कडा टिप्पणी गरेका छन् ।

तनहुँ १ मा पार्टीका उम्मेदवार गोविन्द भट्टराईको उम्मेदवारी दर्ताअघि भएको चुनावी सभालाई सम्बोधन गर्दै थापाले अब केही दिन न्याय–अन्याय, मान–अपमानको विषय सुनिने बताए । पञ्चायतको कालरात्रिका बेला शान्तिपूर्ण ढंगले जीवन बिताउँछु मात्र भनेको भए राष्ट्रिय पञ्चायतको सदस्य, मन्त्री पाउने नेताहरुको अगाडि आफूले संघर्षको कुरा गर्न नसुहाउने उनले बताए ।

तर आफूहरुले पनि मन्त्री र सांसद बन्छु कि बन्दिनँ भनेर नहेरेको बताए । त्यसो यस्तो हेरेको भए विश्वप्रकाश शर्मा र प्रदीप पौडेलहरु आफ्नो समर्थक नबस्ने र आफूले पनि शेरबहादुर देउवासँग संसदीय दलको चुनाव नलड्ने उनले सुनाए ।

‘झापाबाट निर्वाचित भएर आएको विश्वप्रकाश शर्मा निर्वाचन हार्दै गरेको गगन थापाको प्रस्तावक बस्दै गर्दा ५ वर्ष मन्त्री हुँदिन भन्ने थाहा थिएन ? तनहुँको प्रदीप पौडेल, जो काठमाडौंबाट निर्वाचित भएको छ, गगन थापाको समर्थन बस्दै गर्दा मुखमै आएको मन्त्री बन्ने अवसरबाट वञ्चित हुन्छ भन्ने थाहा थिएन ? थाहा थियो’ उनले अघि भने, ‘म पनि चुनाव लडें, विश्वप्रकाश, प्रदीप, बद्री पाण्डे लगायतका साथीहरु मेरो वरिपरि उभिनुभयो ।’

आफूहरु पार्टीभित्र संघर्ष गरिरहेको र निरन्तरको संघर्षबाट कांग्रेसमा बदलाव ल्याउने उनले बताए । ‘एउटा सांसद बन्ने कुरा वा एउटा मन्त्री बन्ने कुरा म बन्ने कुरा, म बाहेक अरु कोही छैन भन्ने लोभ भएको भए आज शेरबहादुर देउवासँग संसदीय दलको चुनाव लड्न म जान्नथें’ उनने भने, ‘मेरो प्रस्तावक बन्न विश्वप्रकाश शर्मा आउँदैनथे, समर्थक बस्न प्रदीप पौडेल आउँदैनथे ।’

कांग्रेसमा सुधार आफूहरुको लडाइँ भएको भन्दै उनले भ्रममा नपर्न देशभरिका तन्नेरीहरुलाई आग्रह गरे । कांग्रेस छाडेर रास्वपाका उम्मेदवार वाग्लेको नाम नलिई उनले भने, ‘कहिलेकाहीं साथीहरु भन्नुहुन्छ यति वर्ष विदेशमा यो गरेर आएको, जागिर छाडेर आएको । मलाई भन्न मन लाग्छ मैले त जागिर नखाएको, तिमीले जागिर खाएर छोडेर आएको ।’

उनले अघि भने, ‘मलाई त भन्न मन लाग्छ, तिमी त जागिर खाएको, घर बनाएको, पेन्सन पकाएको अनि आएको, म त त्यो बेलामा सडकमा लडेर बसेको ।’

हेर्नुहोस् भिडियो