२०८० वैशाख ३ गते ७:०८ 
३ वैशाख, काठमाडौं । एर्लिङ हालान्डको दुई गोल मद्दतमा प्रिमियर लिगको साविक विजेता म्यानचेष्टर सिटीले शनिबार लेस्टर सिटीलाई ३-१ ले पराजित गर्दै उपाधि होड कायम राखेको छ ।
सिटीले लिग लिडर आर्सनलसँग अंक दूरी जम्मा ३ मा झारेको छ ।
घरेलु मैदान एतिहाड स्टेडियममा भएको खेलमा सिटीले पहिलो हाफमै ३ गोल गरेको थियो । जोन स्टोन्सले पाँचौ मिनेटमा गोल गरी अग्रता दिलाएका थिए । त्यसपछि हालान्डले १३औं मिनेटमा पेनाल्टीमा गोल गर्दै अग्रता दोब्रर पारे भने २५औं मिनेटमा व्यक्तिगत दोस्रो गोल गरे ।
लेस्टरका लागि केहलेची इहनाचोले ७५औं मिनेटमा एक गोल फर्काए ।
जितपछि दोस्रो स्थानको सिटीको ३० खेलबाट ७० अंक भएको छ । समान खेलबाट आर्सनलको ७३ अंक छ ।
आइतबार वेष्टह्यामसँग खेल्दा आर्सनललाई अंक दूरी बढाउने मौका हुनेछ । त्यसपछि आर्सनल र सिटीको खेल हुनेछ ।
चेल्सीको अर्को हार
लिगमा खराब प्रदर्शन गरिरहेको चेल्सी शनिबार ब्राइटनसँग २-१ ले पराजित भयो । ब्राइटनले सुरुमा पछि परे पनि कमब्याक गरेको थियो ।
घरेलु मैदान स्टानफोर्ड ब्रिजमा कोनोर गालेघरले १३औं मिनेटमा गोल गरी चेल्सीलाई अग्रता दिलाएका थिए । तर ड्यानी वेलब्याकले ४२औं मिनेटमा ब्राइटनका लागि बराबरी गोल गरे भने जुलियो एनसिसोले ६९औं मिनेटमा विजयी गोल गरे ।
हारपछि चेल्सी ३१ खेलबाट ३९ अंकसहित ११औं स्थानमै छ । २९ खेलबाट ४९ अंक जोडेको ब्राइटन सातौं स्थानमा छ ।
लिगमा तेस्रो स्थानको न्युकासल एस्टन भिल्लासँग ३-० ले पराजित भएको छ भने पाँचौ स्थानको टोटनहम एएफसी बर्नमाउथसँग ३-२ ले पराजित भयो ।
प्रतिक्रिया 4