सभामुखको गुनासो : बैठकमा सांसदको उपस्थिति कमजोर भयो

२४ वैशाख, काठमाडौं । सभामुख देवराज घिमिरेले संसद बैठकमा सांसदहरुको उपस्थिति कमजोर भएको गुनासो गरेका छन् ।

संघीय संसदको वर्षे अधिवेशन (बजेट अधिवेशन) आइतबार सुरु हुँदैछ । बैठकअघि बसेको कार्यव्यवस्था परामर्श समितिको बैठकमा सभामुख घिमिरेले सांसदहरुको उपस्थितिबारे प्रश्न उठाएका हुन् ।

‘संसदमा माननीयहरुको उपस्थिति कमजोर भएको छ । सांसद तलब भत्ता खान मात्र बैठकमा आउँछन् भन्ने आम बुझाइ छ’, सभामुखको भनाइबारे उनको सचिवालयले भनेको छ, ‘दल तथा माननीयज्यूहरुलाई बैठकमा नियमित र प्रभावकारी उपस्थितिका लागि ध्यानाकर्षण गराउँदछु ।’

प्रतिनिधिसभाको अघिल्लो अधिवेशनमा दुई वटा बैठकमा गणपूरक संख्या नपुगेर विधेयक अगाडि बढाउने प्रक्रिया रोकिएका थिए । यस्तो समस्या आउन नदिनेतर्फ सबै सचेत हुुनुपर्ने सभामुख घिमिरेको भनाइ छ ।