नारिता विमानस्थलमा अवतरण गर्दा ‘प्लेन ओभरस्पिड’ गराएका दुई पाइलट ग्राउण्डेड

७ असार, काठमाडौं । नेपाल नागरिक उड्डयन प्राधिकरणले नेपाल वायुसेवा निगमका दुई पाइलटलाई ग्राउण्डेड गरेको छ ।

नेपाल एयरलाइन्सको वाइडबडी जहाज उडाएका दुई पाइलटले १५ जुनका दिन जापानको नारिता विमानस्थलमा जहाज ‘ओभरस्पिड’मा अवतरण गराउन खोजेका थिए ।

सो क्रममा जहाज ओभरसुट गर्नु परेको प्राधिकरणका सूचना अधिकारी ज्ञानेन्द्र भुलले जानकारी दिए ।

यसबारे नेपाल एयरलाइन्सले नै छानविन गरी एक प्रतिवेदन प्राधिकरणमा बुझाएको थियो । त्यसपछि प्राधिकरणले घटनाबारे छानविन गरी १५ दिन भित्र प्रतिवेदन बुझाउने गरी ३ सदस्यीय छानविन समिति गठन गरेको छ ।

समितिले प्रतिवेदन नदिएसम्म यी पाइलटले जहाज उडाउन पाउने छैनन् ।