कान्सेलो र फेलिक्सको डेब्यु खेलमा बार्सिलोना विजयी

काठमाडौं । जाआओ कन्सेलो र जाआओ फेलिक्सले दोस्रो हाफमा वैकल्पिक खेलाडीको रुपमा डेब्यु गरेको खेलमा बार्सिलोनाले ओसासुनालाई ला लिगामा २-१ ले पराजित गरेको छ ।

रोबर्ट लेवान्डोस्कीले खेल सकिन पाँच मिनेटअघि पेनाल्टीमा गोल गरेपछि बार्सिलोनाले ३ अंक जोडेको हो ।

ओसासुनाको मैदानमा भएको खेलमा जुल्स कोन्डेले पहिलो हाफको इन्जुरी टाइममा गोल गर्दै बार्सिलोनालाई अग्रता दिलाएका थिए । तर ओसासुनाका चिली अभिलाले ७६औं मिनेटमा गोल गर्दै खेल १-१ को बराबरीमा ल्याए । त्यसपछि लेवान्डोस्कीले निर्णायक गोल गरे ।

ओसासुनाका अलेजान्द्रो काटेनाले लेवान्डोस्कीलाई फल गरेपछि बार्सिलोनाले पेनाल्टी पायो भने रेफ्रीले काटेनालाई रातो कार्ड देखाए । दश खेलाडीमा समेटिएको ओसासुना विरुद्ध लेवान्डोस्कीले नै पेनाल्टीमा गोल गरी बार्सिलोनालाई जित दिलाए ।

सुरुमा पहेँलो कार्ड मात्र पाएपनि भिएआरको सहयोगमा काटेनालाई रातो कार्ड देखाइएको हो ।

जितपछि चार खेलबाट १० अंक जोडेको बार्सिलोना तेस्रो स्थानमा उक्लेको छ ।

म्यानचेष्टर सिटीका कान्सेलो र एट्लेटिको मड्रिडका फरवार्ड फेलिक्स डेडलाइन डे मा लोनमा बार्सिलोनामा अनुबन्ध भएका थिए । सन् २०१७ पछि कान्सेलोले पहिलो पटक ला लिगा खेलेका हुन् ।

यस्तै एथ्लेटिक विल्वाओबाट बार्सा आएका इनिगो मार्टिनेजले पनि ओसासुना विरुद्ध बार्सिलोनाका लागि डेब्यु गरे ।