टीआरसी विधेयक अध्ययन उपसमितिको म्याद दोस्रो पटक थपियो

१९ भदौ, काठमाडौं । बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (टीआरसी) ऐनको संशोधन विधेयकमाथि छलफल गर्न गठित संसदीय उपसमितिको म्याद फेरि थपिएको छ ।

मंगलबार बसेको प्रतिनिधि सभाको कानुन, न्याय तथा मानवअधिकार समितिको बैठकले उपसमितिको म्याद सात दिन थप गरेको हो ।

५ जेठमा २१ दिन समय दिएर गठन भएको उपसमितिको ५ साउनमा १५ दिन समय थप गरिएको थियो । तर थपिएको समयमा पनि उपसमितिले विधेयकमा सहमति जुटाउन नसकेपछि पुन: ७ दिन थप गरिएको हो ।

उपसमितिका जेष्ठ सदस्य ध्रुवबहादुर प्रधानका अनुसार छलफलको चरण सकिएको तर प्रतिवेदन लेख्न बाँकी छ । समितिले प्रतिवेदन तयार गर्न भन्दै थप सात दिन उपसमितिलाई दिएको छ ।