मुस्ताङ गल्फ च्यालेन्जको उपाधि श्यामलाई

३० भदौ, पोखरा । दोस्रो मुस्ताङ गल्फ च्यालेन्जको उपाधि डिफेन्डिङ च्याम्पियन श्याम तामाङले जितेका छन् । ९ होल ३६ पारमा भएको खेल श्यामले एक अन्डर १९ अंकका साथ उपाधि जितेका हुन् ।

शनिबार सर्वाधिक उचाई ४६४५ मिटरमा भएको खेलमा पोखरेली गल्फर लिलाजंग गुरुङ दोस्रो भएका छन् । उनले लेवल पार १८ अंक जोडे ।

प्रतियोगितामा महिलातर्फ पोखरकै जुनी गुरुङ विजयी भएकी छन् । उनले १५ स्कोर गर्दा काठमाडौंकी गल्फर सुष्मा सिंह १३ अंकका साथ दोस्रो भइन् ।

रविन राना ग्रस च्याम्पियन भएका छन् । समान अंक जोडेका याम राना र पीवी राईलाई ब्याक काउन्टमा रवीनले पराजित गरेका हुन् । तीनै जनाले ११ अंक जोडेकोमा अन्तिम होलमा रविनले २ अंक जोडेपछि उपाधीको छिनोफानो भएको हो ।

सर्वाधिक बर्डिजको उपाधि आत्मराम सिंखडाले जिते भने लंगेस्ट ड्राइभ माधव सिंखडाले हिर्काए । सिनियर तर्फको पुरस्कार भने पोखराका बलराम थापाले पाए । ६१ वर्षका थापाले १६ स्कोर गरेका थिए । उनी गतवर्षको उपविजेता हुन् ।

४ हजार ६ सय ४५ मिटरको उचाईको कोर्षमा भएको प्रतिस्पर्धामा तामाङले ९ होलमा १९ स्कोर बनाए । उनले एक अन्डर खेल्दै उपाधि उचाल्दा पोखराका लिलाजंग भने १८ अंकसहित दोस्रो स्थानमा चित्त बुझाए ।

लिलाजंगले लेभलपार १८ को स्कोर बनाएका थिए । २४ पुरुष गल्फर सहभागिता रहेको प्रतिस्पर्धाको ग्रस तर्फ रविन राना च्याम्पियन बने । उनले पोखराका याम रानालाई पछाडि पारे । क्लोजेष्ट टु दी पीन मेजर विजय लामाले पाए ।

होल इन वान कसैले पनि जित्न सकेन । होल इन वानका लागि घोडा र ५० कार्टुन स्याउ पुरस्कार राखिएको थियो ।

२४ पुरुष र ४ महिला गरी २८ गल्फर सहभागी खेल स्टेवल फोर्ड फर्म्याटमा खेलाइएको थियो । अघिल्लो वर्ष निर्माण गरिएको कोर्सलाई विश्व गिनिज बुकमा रेकर्ड गराउने प्रयास गरिएको छ ।

त्यसैका लागि मुस्ताङ गल्फ कोर्स दर्ता गरेर जग्गा प्राप्तिको प्रक्रिया थालिएको प्रवन्ध निर्देशक तथा पूर्व सांसद इन्द्रधारा विष्टले जानकारी दिए । उनले नेपालमा नयाँ पहिचान थप्ने सपना अनुसार काम गरिरहेको बताए ।

‘सर्वोच्च शिखर सगरमाथा र लुम्बिनीसँगै विश्वले अव सर्वाधिक उचाईमा रहेको गल्फ कोर्स रहेको भूमि का रुपमा पनि नेपाललाई चिन्नेछ,’ उनले भने, ‘त्यसैलाई सघाउन प्रवर्द्धनात्मक गल्फ प्रतियोगिता गरिएको हो ।’