विद्यालय शिक्षा विधेयकलाई सुल्टो बनाउनुपर्छ : गगन थापा

१९ असोज, काठमाडौं । नेपाली काग्रेसका महामन्त्री गगनकुमार थापाले बृहत छलफल गरेर विद्यालय शिक्षा विधेयकलाई सुल्टो बनाउनुपर्ने बताएका छन् ।

विद्यालय शिक्षा विधेयक, २०८० विचार गरियोस् भन्ने प्रस्तावमाथि शुक्रबार संसदमा भएको छलफलमा भाग लिँदै महामन्त्री थापाले संविधान र पाठ्यक्रमले गरेको अपेक्षा पूरा गरेमात्रै शिक्षा विधेयकले सार्थकता पाउने बताए ।

अहिलेको अवस्था र अबको अपेक्षा दुबै नहेरी विधेयक आएको भन्दै उनले अब संसदले सच्याउनुपर्ने बताए । ‘यो समितिमा जान्छ आज, समितिमा गएपछि हामीले हतार नगरि काम गर्नुपर्नेछ । दुई महिना लागोस् पाँच महिना लागोस्, वृहत छलफल गरेर उल्टो भएको विधेयकलाई सुल्टो बनाउनुपर्नेछ ।’

विद्यालय शिक्षा विधेयकलाई संघीयतासँग जोड्नुपर्ने र विद्यार्थीलाई केन्द्रमा राख्नुपर्ने, शिक्षण पेशालाई आकर्षक पेशा, मर्यादित पेशा, सबैभन्दा हाईएस्ट पेड बनाउनुपर्ने भन्दै उनले भने, ‘एक वर्ष नै लागेपनि संसदले कानून बनाइसकेपछि अर्को १५–२० वर्ष नेपालको विद्यालय शिक्षालाई यसले मार्ग दर्शन गर्नुपर्नेछ ।’