संकल्प यात्रामा अवरोध नगर्न एमालेको आग्रह

२६ मंसिर, काठमाडौं । नेकपा एमालेले मध्यपहाडी संकल्प यात्रालाई अवरोध नगरिदिन आग्रह गरेको छ ।

‘हामीले आग्रह गर्दै आएका छौं । यो यात्रालाई सहयोग गरिदिनुहोस्, नभए अवरोध पनि नगरिदिनुहोस्’, अनलाइनखबरसँग प्रचार विभाग प्रमुख राजेन्द्र गौतमले भने ।

गत १४ मंसिरमा बैतडीको झुलाघाटबाट सुरु भएको एमालेको संकल्प यात्रा आजबाट कोशी प्रदेश प्रवेश गरेको छ । तर पहिचान पक्षधर सामाजिक संस्थाहरुले एमालेको यात्रालाई अवरोध गर्ने तयारी गरेको छ ।

‘अभियानलाई छेक्ने, अवरोध गर्ने र बन्द गर्ने कार्य लोकतान्त्रिक कुरा होइन । असहमति भए औपचारिक रुपमा संवैधानिक र शान्तिपूर्ण ढंगले राख्न सक्नु हुन्छ’, गौतमले भने । तर एमालेलाई मात्रै निशाना बनाएर बन्द हड्ताल गर्नु लोकतान्त्रिक नहुने उनले बताए ।