असई थमन विक हत्या प्रकरणको आज सुनुवाइ

२८ मंसिर, जनकपुरधाम । मधेश आन्दोलनको क्रममा महोत्तरीमा भएको सशस्त्र प्रहरीका असई थमन विक हत्या प्रकरणमा जिल्ला अदालत महोत्तरीको आज अन्तिम फैसला आउने सम्भावना छ ।

२५ भदौ २०७२ मा भएको असई विक हत्या प्रकरणमा नेकपा एमालेका प्रतिनिधिसभा सदस्य लक्ष्मी महतोसहित २८ जनाविरुद्ध २०७५ साल साउन २८ गते कर्तव्यज्यान मुद्दा दर्ता भएको थियो ।

जिल्ला अदालत महोत्तरीको न्यायाधीश उद्धव प्रसाद भट्टराईको दुई नम्बर इजलासमा मुद्दाको सुनुवाइ हुँदै छ । बहस अन्तिम चरणमा रहेकाले आजै मद्दाको अन्तिम फैसला आउने सम्भावना रहेको जिल्ला अदालत महोत्तरीका सूचना अधिकारी महेन्द्र झाले बताए ।

सो मुद्दामा तीनजना पुर्पक्षका लागि थुनामा छन् भने चारजना तारेखमा रिहा भएका छन् ।

दुईजना तारेख गुजारेर बसेका छन् । एमालेका प्रतिनिधिसभा सदस्य लक्ष्मी महतो र मोहन ठाकुर तारिख गुजारेर बसेका छन् । उनीहरुसहित १९ जना फरार छन् ।

जिल्ला अदालत महोत्तरीका सूचना अधिकारी झाले दिएको जानकारी अनुसार सो मुद्दामा सन्दीप साह माझी, सन्जय कुमार साह र पवन कापर पुर्पक्षका लागि थुनामा छन् ।

त्यस्तै लोसपा मधेश प्रदेश संसदीय दलका नेता अभिराम शर्मा, जलेश्वर नगरपालिकाका पूर्व मेयर रामाशंकर मिश्र, सुरेश पाण्डे र धर्मेन्द्र राय साधारण तारेखमा छुटेका छन् ।

यो मुद्दाका अभियोगीहरु रमेश प्रसाद साह, सतेन्द्र चौधरी, चन्देश्वर साह, राजु चौधरी, नरेश साह, रामराजा साह, गोलु साह, हरिओमकुमार भगत, रविन्द्र राम चमार, रञ्जित साह, विकी साह, फुले यादव, रोहित कुमार शर्मा, लालबाबु बिन, सम्भु साह, अनित ठाकुर, अनिल ठाकुर, देवेन्द्र यादव र कौशल कुमार यादव फरार छन् ।

मधेश आन्दोलनको क्रममा २०७२ भदौ २५ गते हेटौंडाबाट राष्ट्रसंघीय मिसनका लागि आवश्यक परीक्षा दिएर ड्युटीको लागि महोत्तरी आएका असई थमन विकमाथि महोत्तरीमा आन्दोलनकारीले आक्रमण गरेका थिए ।

घाइते विकको जलेश्वर अस्पतालमा उपचार हुन नसकेपछि थप उपचारको लागि जनकपुर ल्याउँदै गर्दा महोत्तरीको साविक अनैठा गाविसमा आन्दोलनकारीले एम्बुलेन्सबाट निकालेर कुटपिट गरेर हत्या गरेका थिए ।