२१ चैत, काठमाडौं । काठमाडौं महानगरपालिकाले रत्नपार्कमा भित्ते बगैंचा बनाउन सुरु गरेको छ ।
महानगरले बुधबार रत्नपार्कको आकासे पुलको भित्ते बगैंचामा २०० वटा फूल र लहरे बोटका बिरुवा रोपेको हो ।
पार्क तथा हरियाली प्रवर्द्धन आयोजनाले रत्नपार्कको आकासे पुलको दुई वटा भित्ता उपयोग गरेर भित्ते बगैंचाको परीक्षण थालेको हो ।
आयोजनाका प्रमुख नवराज थापा, महानगर प्रहरी बलका प्रमुख राजुनाथ पाण्डे सहितको टोलीले फूल तथा बिरुवा रोपेका हुन् ।
आयोजना प्रमुख थापाका अनुसार फूलमा बेगमबेली र स्वस्थानी फूल रोपिएका छन् ।
बेगनबेलीमा पनि गुलाबी, रातो, सेतो, पहेंलो, सुन्तले गरी विभिन्न प्रकारका फूल फुल्ने बिरुवा छन् । सामान्यतया यो जातको फूल ४ देखि ६ महिनासम्म फुलिरहन्छ ।
यी बिरुवा बढ्दै जाँदा काँटछाँट गरेर मिलाउँदै जानुपर्छ । यसबाट आफूले चाहेको आकार र स्वरुपको बनाउन सकिन्छ ।
हरियाली हुने बिरुवामा होया, मनिप्लान्ट, आइभ्यूका बिरुवा छन् । यी बिरुवा लहरिंदै बढ्दै जाने थापाले बताए ।
यी आकासे पुलका भित्ताहरू साढे ३२ मिटर लामा छन् भने उचाइ साढे ६ मिटरसम्म छ । भित्ताको जमिन सतहमा खाडल खनेर फूलका बिरुवा रोपिएका छन् ।
लहराउने विरुवालाई गमलामा झुन्ड्याइएको छ । यसमा बिरुवा लहराउन भित्ताभरि २/२ वर्गमिटरका जालीदार बार बनाइएको महानगरले जनाएको छ ।
आयोजनाले यो काम ९ लाख ५६ हजार लागतमा सम्पन्न गरेको महानगरले जनाएको छ ।
प्रतिक्रिया 4