६ वर्षीय आरभको एकल चित्रकला प्रदर्शनी

२५ चैत, काठमाडौं । कक्षा युकेजीमा अध्ययनरत आरभबन्धु थापाले काठमाडौंमा एकल चित्रकला प्रदर्शनी गरेका छन् ।

६ वर्षीय थापाले काठमाडौंको नयाँबानेश्वरस्थित एनबी सेन्टरमा आइतबार एकल चित्रकला प्रदर्शनी गरेका हुन् ।

भक्तपुर घर भएका आरभले कोरेका पशुपति र जानकी मन्दिर, जात्रा, शिव लिङ्गलगायतका चित्र प्रदर्शनीमा राखिएको थियो । आरभलाई हौसला प्रदान गर्न बालबालिकादेखि बुढापाकासम्म प्रदर्शनीस्थलमा पुगेका थिए ।

आरम्भका बुवा एवम् फोटो पत्रकार भरतबन्धु थापाले कुनै ठाउँ घुमेर फर्किएलगत्तै चित्र कोरिहाल्ने आरभको स्वभाव रहेको भन्दै उनलाई हौसला प्रदान गर्न एकल चित्रकला प्रदर्शनी गरिएको जानकारी दिए ।

प्रदर्शनीमा उनी अध्ययनरत चेल्सी वर्ल्ड स्कुलले सहयोग गरेको थियो ।