एक कम्पनीले ल्यायो बेखुसी बिदाको नियम, मूड नभए अफिस नगए हुन्छ

जागिरे मानिसहरुको एउटा दु:ख हुन्छ । आफ्नो निजी जीवनमा चाहे जतिसुकै समस्या आइरहेको किन नहोस् अफिस जानैपर्छ र त्यहाँ गएर काम गर्नैपर्छ । अर्थात् कुनै घरेलु समस्या होस्, कसैसँग झगडा भएको होस् वा मन दुखेको किन नहोस्, त्यस्तो अवस्थाको कर्मचारीबाट पनि कार्यालयमा सामान्य अवस्थामा जस्तो कार्यसम्पादनको अपेक्षा गरिन्छ ।

व्यक्तिको निजी मामिलाले उसको काममा कुनै असर पर्नु हुँदैन भन्ने मान्यता राखिन्छ । तर, अब समय बदलिएको छ । मानिसको निजी समस्या वा उसको मूडले पनि कार्यालयमा उसको काममा असर पार्ने यथार्थलाई हृदयंगम गर्न थालिएको छ । यसको प्रमाण हो चीनको एउटा कम्पनी ।

उक्त चिनियाँ कम्पनीले आफ्ना कर्मचारीलाई बेखुसी बिदा (unhappy leave) दिन सुरु गरेको छ ।

चीनको हेनान प्रान्तस्थित एक सुपरमार्केट चेन पेंग डोंगले यस्तो गज्जबको काम सुरु गरेको हो ।

कम्पनीका मालिक तथा चिनियाँ रिटेल टाइकुन यु डोंगलाइले आफ्ना कर्मचारीहरुको निजी जीवन तथा व्यवसायिक जीवनमा उत्कृष्ट सन्तुलन हासिल गर्नमा मद्दत गर्नका लागि बेखुसी बिदाको सुरुआत गरेको घोषणा गरेका छन् ।

चिनियाँ सुपरमार्केट सप्ताहका क्रममा डोंगले आफ्नो सुपरमार्केटमा कार्यरत कर्मचारीहरुका लागि १० दिनसम्मको बेखुसी विदाको घोषणा गरेका हुन् । अर्थात् काममा जानका लागि मूड ठीक नभएको अवस्थामा पेंग डोंगका कर्मचारीले १० दिनसम्मको ‘अनह्याप्पी लिभ’ लिन पाउनेछन् ।

यु डोंगलाईले भनेका छन्- मेरा सबै कर्मचारीलाई स्वतन्त्रता प्राप्त होस् भन्ने मैले चाहन्छु । हरेक जीवनमा यस्तो क्षण आउँछ जब हाम्रो मन खुसी हुँदैन । त्यसैले मन दु:खी भएको बेला काममा नआउनुहोस् । कर्मचारीहरुले आफ्नो आरामको समय आफैंले छानुन् र उनीहरु सबैलाई कामभन्दा बाहिर पर्याप्त आराम मिलोस् ।

उनका अनुसार जुनसुकै कर्मचारीले बेखुसी बिदा मागेको खण्डमा त्यसलाई अस्वीकार नगरिने बताएका छन् ।

बेखुसी बिदाको अवधारणालाई चिनियाँ सोसल मिडियामा निकै समर्थन प्राप्त भैरहेको छ । त्यति राम्रो हाकिम र कार्यसंस्कृतिलाई देशभर प्रचारित गर्नुपर्ने सोसल मिडिया प्रयोगकर्ताहरुले बताएका छन् । कतिपयले त आफूले अहिलेको काम छाडेर सोही कम्पनीमा काम गर्न इच्छुक रहेको पनि उल्लेख गरेका छन् ।

स्मरण रहोस् कार्यस्थलको चिन्ता सम्बन्धमा गरिएको एक सर्भेक्षण अनुसार चीनमा ६५ प्रतिशतभन्दा धेरै कर्मचारीहरु कामले थाकेका हुन्छन् बेखुसी महसुस गरिरहेका हुन्छन् ।

आफ्ना कर्मचारीलाई बेखुसी बिदा दिने यू ले गत वर्ष नै लामो समयसम्म कर्मचारीहरुलाई काममा लगाउने चिनियाँ कम्पनीका व्यवस्थापकहरुको आलोचना गर्दै कर्मचारीहरुलाई ओभरटाइम काममा लगाउनु अनैतिक हुनुका साथै अन्य मानिसहरुको विकासका अवसरको पनि हनन भएको बताएका थिए।

उनको रोजगार नीति अनुसार कर्मचारीहरुालई दिनमा ७ घण्टा काम, सप्ताहन्तमा छुट्टी, ३० देखि ४० दिनको वार्षिक बिदा र नयाँ वर्षमा थप पाँच दिन बिदा दिइन्छ ।

आफ्नो कम्पनीको भविष्यका बारेमा उनी भन्छन् – हामी ठूलो बन्न चाहँदैनौं । हाम्रा कर्मचारीहरु स्वस्थ तथा आरामदायक जीवन जिउन भन्ने हाम्रो चाहना हो र कम्पनीले पनि सोही अनुसार काम गरिरहेको छ ।