दक्षिण कोरिया अध्ययन गर्न जाने विद्यार्थीलाई सरकारले रोक्यो एनओसी

News Summary

Generated by OK AI. Editorially reviewed.

नेपाल सरकारले दक्षिण कोरियामा अध्ययन गर्न जाने विद्यार्थीहरूलाई दिइने एनओसी स्थगित गरेको छ ।
शिक्षा मन्त्रालयले अध्ययनको निरन्तरता र विद्यार्थीहरूको सुरक्षालाई ध्यानमा राखेर एनओसी स्थगित गरेको जानकारी दिएको छ र थप निर्णय कार्यदलको प्रतिवेदनपछि लिइनेछ।
सरकारले विद्यार्थीहरूलाई कोरियामा अध्ययनको क्रममा रोजगार र विश्वविद्यालयको छनोटमा समस्या आउन सक्ने र अवैध काम गर्न प्रेरित हुने आशंकाका कारण यो निर्णय गरेको हो।

३० वैशाख, काठमाडौं । दक्षिण कोरियामा भाषा तथा स्नातक अध्ययन गर्न जाने विद्यार्थीलाई दिइने वैदेशिक अध्ययन अनुमति पत्र (एनओसी) सरकारले स्थगित गरेको छ ।

शिक्षा, विज्ञान तथा प्रविधि मन्त्रालयले मंगलबार सूचना जारी गर्दै एनओसी स्थगित गरेको हो । डी टू र डी फोर भिसा नियमन गर्न कार्यदल गठन गर्ने र त्यसले दिने प्रतिवेदनको आधारमा थप निर्णय लिइने मन्त्रालयले जनाएको छ ।

सूचनामा कोरियामा डी टू र डी फोर भिसामा अध्ययन गर्न जाने विद्यार्थीहरूलाई एनओसी दिन स्थगित गरिएको उल्लेख छ ।

सरकारले विद्यार्थीहरू (विशेष गरी अन्डर ग्य्राजुएट कोर्स अध्ययन गर्न) सुरुदेखि नै रोजगारीमा बढी प्राथमिकता दिएकाले अध्ययनमा निरन्तरता नहुने, स्टडी आवर कम भएका विश्वविद्यालयमा भर्ना हुने, पैसा कमाउन प्राथमिकता दिँदा अध्ययनको निरन्तरतामा समस्या आउने, कोरिया सरकारले कालोसूचीमा राखेका विश्वविद्यालयहरूमा समेत विद्यार्थी पठाउने गरेको जस्ता कारण देखाएको छ ।

एनओसी लिन यसरी विद्यार्थीको घुइँचो लाग्ने गरेको छ । फाइल फोटो ।

मन्त्रालयले विद्यार्थीलाई कन्सल्टेन्सीहरूले कोरिया जानेबित्तिकै अवैधानिक रूपमा भए पनि काम गर्न पाइने भनेर आश्वासन दिने तर उता गएपछि सोचेजस्तो नहुँदा विद्यार्थीहरू मानसिक तनाव र समस्यामा पर्ने गरेको गुनासोसमेत आएको जनाएको छ ।