धितोपत्र बोर्डले बजारका अनैतिक क्रियाकलाप नियन्त्रण गर्ने आशामा लगानीकर्ता

News Summary

Generated by OK AI. Editorially reviewed.

लगानीकर्ताले धितोपत्र बोर्डको नयाँ नेतृत्वले बजारको गलत क्रियाकलाप नियन्त्रण गर्न अपेक्षा व्यक्त गरे।
उनीहरूले पूँजीबजारलाई विश्वसनीय र प्रतिस्पर्धी बनाउन पूर्ण सहयोग गर्ने बताए।
बोर्डले आईपीओ र सेयर बिक्री प्रक्रियामा पारदर्शिता र नियमन कडाइ गर्ने तयारी गरेको छ।

२० जेठ, काठमाडौं। लगानीकर्ताले धितोपत्र बोर्डको नयाँ नेतृत्वले पछिल्लो समयमा बजार भइरहेका गलत क्रियाकलापप्रति निर्मम भएर नियन्त्रण गर्ने अपेक्षा व्यक्त गरेका छन् । मंगलबार बोर्ड अध्यक्ष सन्तोषनाराण श्रेष्ठलाई भेट गर्दै लगानीकर्ताहरूले यस्तो आशा व्‍यक्त गरकेा हुन् ।

भेटमा लगानीकर्ताले पूँजीबजार अन्तर्राष्ट्रियस्तरीय, विश्वसनीय र प्रतिस्पर्धी बनाउने कार्यमा लगानीकर्ताका संघ संस्थाबाट पूर्ण सहयोग हुने बताए ।

लगानीकर्ताका ३ संस्था एकैपट बोर्ड अध्यक्ष भेट्न गएका प्रतिनिधिले पारदर्शिता, सुशासन र लगानीमैत्री वातावरणको विकास गरी बजार प्रतिको विश्वास बढाउन अध्यक्ष समक्ष अनुरोध गरे ।

पूँजीबजारको पहुँच देशका हरेक कुनाकाप्चासम्म फैलिनु पर्ने बताउँदै उनीहरूले लगानीकर्ताहरुको हक हितको संरक्षणमा बोर्डले विषे चासो दिन आग्रह गरे । आर्थिक समृद्धिमा पूँजीबजारले अझ प्रभावकारी योगदान पुर्याउन सुझाव दिएका छन् ।

नयाँ अध्यक्ष आएसँगै पूँजी बजारमा सुधार ल्याउने गतिविधि अघि बढेको उनीहरुको भनाइ छ । अल्पकालीन, मध्यकालीन र दीर्घकालीन योजनामार्फत पूँजी बजारको दिगो विकास गर्न प्रतिबद्ध रहेको विषयले लगानीकर्ताको विश्वासलाई बलियो बनाउने अपेक्षा उनीहरुको छ ।

हाल आईपीओ (प्राथमिक निष्कासन) प्रस्तावमध्ये अधिकांश कम्पनीहरू लेखा समितिको निर्देशनअनुसार नेटवर्थ ९० भन्दा कम भएका कम्पनीहरूको प्रस्ताव पुनरावलोकन गर्ने र आईपीओ प्रक्रियालाई पारदर्शी बनाउने पहल भएको उनीहरुको भनाइ छ।

हाइड्रोपावर कम्पनीका संस्थापक सेयरधनीहरूले आयोजना सम्पन्न नहुँदै सेयर बिक्री गर्ने प्रवृत्तिमा रोक लगाउने गरी नीति निर्माणको तयारी भएको छ ।