‘अर्थतन्त्र चलायमान बनाउन चलचित्रको योगदान महत्वपूर्ण’

काठमाडौं । प्रशासनिक प्रशिक्षण प्रतिष्ठानद्वारा आयोजित ४० दिने ‘एड्भान्स कोर्स अन म्यानेजमेन्ट एण्ड डेभलपमेन्ट’ शीर्षकअन्तर्गत ‘सिनेमाको आर्थिक प्रभाव’ विषयक गोष्ठी सम्पन्न भएको छ ।

२५ जना उपसचिव सहभागी उक्त सेमिनार ‘नो योर इकोनोमी’ सन्दर्भअन्तर्गत आयोजना गरिएको हो ।

सेमिनारमा चलचित्र विकास बोर्डका अध्यक्ष दिनेश डीसी र अभिनेता रमित ढुंगाना सहभागी थिए । कार्यक्रममा अध्यक्ष डिसीले चलचित्रले अर्थतन्त्र र सामाजिक क्षेत्रमा पुर्‍याउन सक्ने योगदान बारे धारणा राखे ।

डीसीले प्रस्तुत गरेको कार्यपत्रमा चलचित्र क्षेत्र लगायतका सरोकारवालालाई नीति निर्माण र कार्यान्वयनमा सहयोग पुग्ने अपेक्षा व्यक्त गरिएको छ ।

चलचित्र क्षेत्रलाई औपचारिक करको दायरामा ल्याउन सकिने र विभिन्न प्रोत्साहनका माध्यमबाट राष्ट्रिय अर्थतन्त्रको योगदानमा वृद्धि गर्न सकिने धारणा समेत राखिएको थियो ।

प्रतिष्ठानका कार्यकारी निर्देशक तथा पूर्वसचिव रामशरण पुडासैनीले चलचित्र उद्योगका सकारात्मक प्रभाव र सम्भावनाबारे दृष्टिकोण प्रस्तुत गरेका थिए ।

गोष्ठीले नेपालको अर्थतन्त्रमा चलचित्र क्षेत्रको योगदानलाई समेटी समग्र अर्थतन्त्रलाई चलायमान र अभिवृद्धि गर्न विभिन्न उपायको खोजीमा महत्वपूर्ण भूमिका निर्वाह गर्ने निष्कर्ष निकालेको छ ।