क्षमा पूजा गरेर गहनापोखरी पुनर्निर्माण सुरु

News Summary

Generated by OK AI. Editorially reviewed.

नरः दे (हाँडीगाउँ) मा रहेको गहनापोखरी पुनर्निर्माणको काम ५ करोड २० लाख रुपैयाँ लागतमा सुरु गरिएको छ।
काठमाडौं महानगरपालिकाको सम्पदा तथा पर्यटन विभागले ३१ असोज २०८२ मा सुजनराज जेभीलाई पोखरी पुनर्निर्माणको कार्यादेश दिएको छ।
पोखरी पुनर्निर्माण ३० असोज २०८३ भित्र सम्पन्न गरिसक्नुपर्नेछ र यसमा पैदलमार्ग, हरियाली, फल्चा, खेल्ने ठाउँ र प्रहरी बिट निर्माण हुनेछ।

१८ कात्तिक, काठमाडौं । क्षमा पूजा गरेर नरः दे (हाँडीगाउँ) मा रहेको गहनापोखरी पुनर्निर्माणको काम सुरु गरिएको छ ।

५ करोड २० लाख रुपैयाँ लागतमा पोखरी पुनर्निर्माण हुनेछ । निर्माण कार्यका लागि सुजनराज जेभीलाई ३१ असोज २०८२ मा काठमाडौं महानगरपालिकाको सम्पदा तथा पर्यटन विभागले कार्यादेश दिएको छ । पोखरी पुनर्निर्माण ३० असोज २०८३ भित्र सम्पन्न गरिसक्नुपर्ने छ ।

योजनाका फोकल पर्सन वरिष्ठ इन्जिनियर रवीन्द्र रिजालका अनुसार पोखरी, त्यसको वरिपरि पैदलमार्ग, हरियाली प्रवर्द्धन र सडक आडमा भएका खाली ठाउँमा फल्चा, खेल्ने ठाउँ लगायत संरचना हुनेछन् । त्यसमध्ये १३ हजार वर्गफिटमा पोखरी निर्माण हुनेछ ।

पोखरीको वरिपरि ६ देखि ८ फिटसम्मको पैदलमार्ग हुनेछ । त्यसको बाहिर कालोपत्र सडक छ । यसको बाहिर दक्षिणतर्फ १ सय वर्गफिट क्षेत्रफलको ३ कवलको एउटा र उत्तरपट्टि ३ सय १७ वर्गफिट क्षेत्रफल भएको ९ कवलको एउटा फल्चा निर्माण हुनेछ ।

दक्षिण–पश्चिममा २ सय ९६ वर्गफिट क्षेत्रफलको प्रहरी बिट निर्माण हुनेछ । यसको नजिकमा ५ सय ९० वर्गफिट क्षेत्रफलको भवन निर्माण हुनेछ । जसको तल्लो तलामा पर्यटक सूचना केन्द्र र माथिल्लो तलामा पुस्तकालय हुनेछ ।