‘पीआर’ पछि अर्को फिल्म पनि अस्ट्रेलियामा निर्देशन गर्दै बस्नेत

News Summary

Generated by OK AI. Editorially reviewed.

निर्देशक शोभित बस्नेतले अस्ट्रेलियामा छायांकन हुने नयाँ फिल्म 'अनटाइटल' निर्देशन गर्ने पक्का भएको छ।
फिल्मको ६० प्रतिशत छायांकन अस्ट्रेलिया र ४० प्रतिशत नेपाल जुम्लामा गरिने तय भएको छ।
बस्नेतले २० मार्चदेखि 'कमेडी दरबार' टिमलाई अस्ट्रेलिया टूरमा लैजाने तयारी गरेका छन्।

काठमाडौं । निर्देशक शोभित बस्नेतले एकपछि अर्को फिल्मलाई अस्ट्रेलियामा बनाउने भएका छन् । अस्ट्रेलियामै छायांकन गरिएको र कथावस्तु उतैको समेटिएको फिल्म ‘पीआर’ पछि अर्को एक नयाँ फिल्ममा जुटेका छन् ।

त्यहाँका गैरआवासीय नेपाली कृष्ण थापाको प्रस्तुतिमा बन्न लागेको ‘अनटाइटल’ फिल्मलाई बस्नेतले निर्देशन गर्ने पक्का भएको छ । यो फिल्मका निर्मातासँग बस्नेतको लिखित समझदारी भएको छ ।

केही दिनमा फिल्मको औपचारिक घोषणाको तयारी छ । निर्देशनसहित फिल्मको पटकथा पनि बस्नेत स्वयमको हुनेछ । कार्यकारी निर्मातामा नवीन घायल र सह-निर्मातामा हिमाल भण्डारी छन् ।

सौरभ लामाको छायांकन र हिमाल केसीको एक्सन कोरियोग्राफी हुनेछ । ६० प्रतिशत छायांकन अस्ट्रेलिया र ४० प्रतिशत नेपालको जुम्लामा गरिने तय भएको छ । कलाकार तथा अन्य प्राविधिक टिम भने केही दिनमै तय गरिने भएको छ ।

अर्कोतर्फ, बस्नेतले २० मार्चदेखि टिभी कार्यक्रम ‘कमेडी दरबार’ को टिमलाई एक महिनाको लागि अस्ट्रेलिया टूरमा लैजाने तयारी गरेका छन् । सो टुर सकिएलगत्तै फिल्मको छायांकन सुरु हुने जनाइएको छ ।

बस्नेतले हालै निर्देशन गरेको फिल्म ‘पीआर’ को केही कलाकार नयाँ फिल्ममा दोहोरिन सक्ने सम्भावना छ । फिल्ममा दुई नायक र दुई नायिका पात्र हुनेछन् । कास्टिङ हुन बाँकी छ ।

पछिल्लो समय अस्ट्रेलियाली डायस्पोरा नेपाली फिल्मको ठूलो बजार बनेको छ । फिल्मले लोभलाग्दो कमाइ गर्न थालेका छन् । पछिल्लो दशकमा त्यहाँ नेपाली र नेपालीभाषी समुदायको बसोबास बाक्लिएको छ ।