पुसको तुलनामा माघमा बढ्यो मूल्यवृद्धि

News Summary

Generated by OK AI. Editorially reviewed.

नेपाल राष्ट्र बैंकले माघ महिनामा उपभोक्ता मूल्यवृद्धि ३.२५ प्रतिशत रहेको जानकारी सार्वजनिक गरेको छ।
माघमा खाद्य तथा पेय पदार्थ समूहको मूल्यवृद्धि २.५० र गैर–खाद्य तथा सेवा समूहको ३.६६ प्रतिशत रहेको छ।
तरकारी उप–समूहको वार्षिक उपभोक्ता मूल्य सूचकाङ्क ११.६३ प्रतिशतले सबैभन्दा बढी बढेको छ।

२७ फागुन, काठमाडौं । पुसको तुलनामा माघमा मूल्यवृद्धि बढेको छ ।

नेपाल राष्ट्र बैंकले सार्वजनिक गरेको माघ मसान्तसम्मको वित्तीय विवरणअनुसार माघमा उपभोक्ता मूल्यवृद्धि ३.२५ प्रतिशत रहेको छ । पुसमा २.४२ प्रतिशत मात्रै थियो । अघिल्लो वर्षको माघको तुलनामा भने यो माघको मूल्यवृद्धि न्यून हो । अघिल्लो वर्षको माघमा उपभोक्ता मूल्यवृद्धि ४.१६ प्रतिशत थियो ।

यो माघ महिनामा खाद्य तथा पेय पदार्थ समूहको मूल्यवृद्धि २.५०, गैर–खाद्य तथा सेवा समूहको ३.६६ प्रतिशत रहेको छ । आर्थिक वर्ष २०८२/८३ को सात महिनाको औसत मूल्यवृद्धि जम्मा १.९२ प्रतिशत रहेको छ । अघिल्लो वर्षको सोही अवधिको औसत मूल्यवृद्धि ४.८६ प्रतिशत रहेको थियो ।

समीक्षा महिनामा तरकारी उप–समूहको वार्षिक विन्दुगत उपभोक्ता मूल्य सूचकाङ्क सबैभन्दा धेरै ११.६३ प्रतिशत बढेको छ । घ्यू तथा तेलको ७.६१ प्रतिशत र फलफूलको ७.४१ प्रतिशतले बढेको छ ।

दाल तथा गेडागुडी उप– समूहको वार्षिक विन्दुगत उपभोक्ता मूल्य सूचकाङ्क ५.१९ प्रतिशत, खाद्य तथा खाद्यजन्य पदार्थको २.९७ र मरमसलाको २.६१ प्रतिशतले घटेको राष्ट्र बैंकको तथ्यांक छ ।