दुबईको वित्तीय क्षेत्र नजिक खस्यो ड्रोन

News Summary

Generated by OK AI. Editorially reviewed.

दुबईको अल बदाआ क्षेत्रमा शेख जायद रोड नजिक ड्रोन खसेको छ, जुन दुबईको अन्तर्राष्ट्रिय वित्तीय केन्द्र नजिकै छ।
इरानले अमेरिका र इजरायलसँग सम्बन्धित आर्थिक केन्द्रहरूमा आक्रमण गर्ने धम्की दिएपछि उक्त क्षेत्रमा ड्रोन खसेको बताइएको छ।
मध्यपूर्व युद्ध सुरु भएदेखि खाडी क्षेत्रमा इरानी आक्रमणबाट २४ जनाको मृत्यु भइसकेको छ, जसमा सात जना अमेरिकी सैनिक र ११ जना सर्वसाधारण छन्।

२९ फागुन, काठमाडौं । दुबईको वित्तीय क्षेत्र नजिकै एउटा ड्रोन खसेको छ । दुबईको अल बदाआ क्षेत्रमा बिहीबार ड्रोन खसेको हो ।

उक्त ड्रोन शेख जायद रोडमा रहेको एक भवनको बाहिरी भागमा ठोक्किएको अधिकारीहरूलाई उद्धृत गर्दै ‘मकाउ बिजनेस डटकम’ ले जनाएको छ । शेख जायद रोड दुबईको अन्तर्राष्ट्रिय वित्तीय केन्द्र नजिक पर्ने मुख्य सडक हो ।

अमेरिका र इजरायलसँग सम्बन्धित आर्थिक केन्द्रहरूमा इरानले आक्रमण गर्ने धम्की दिएपछि उक्त क्षेत्रमा ड्रोन खसेको बताइएको छ ।

बुधबार अमेरिकी बैंकिङ कम्पनीसँगै परामर्श कम्पनीलगायत अन्य केही कम्पनीहरूले आफ्ना कार्यालयहरू बन्द गर्न र कर्मचारीहरूलाई बाहिर जान भनेका थिए ।

दुबई मध्यपूर्वको एक प्रमुख वित्तीय केन्द्र हो । २८ फेब्रुअरीमा युद्ध सुरु भएपछि दुबईले आफ्ना खाडी छिमेकी मुलुकहरू जस्तै इरानी आक्रमणबाट ठूलो असर भोगिरहेको छ ।

मध्यपूर्व युद्ध सुरु भएदेखि खाडी क्षेत्रले इरानका आक्रमणको ठूलो असर भोगिरहेको छ । जसबाट हालसम्म २४ जनाको मृत्यु भइसकेको छ । मृतकमध्ये सात जना अमेरिकी सैनिक र ११ जना सर्वसाधारण नागरिक रहेका छन् ।