प्रतिनिधिसभा र राष्ट्रिय सभाका बैठक कक्ष तयार हुन अझै २ महिना लाग्ने

News Summary

Generated by OK AI. Editorially reviewed.

सिंहदरबारस्थित नयाँ संसद् भवनमा प्रतिनिधिसभा र राष्ट्रिय सभाका बैठक कक्षहरू तयार हुन अझै एकदेखि दुई महिनासम्म लाग्न सक्ने भएको छ।
सहरी विकास तथा भवन निर्माण विभागले कामचलाउ बहुउद्देश्यीय हल तीन सय जना अट्ने क्षमतामा तयार पारिरहेको छ।
राष्ट्रिय सभा अध्यक्ष नारायणप्रसाद दाहालले नयाँ सांसदहरूको शपथ ग्रहण र बैठकका लागि सबै तयारी गर्न निर्देशन दिनुभएको छ।

२९ फागुन, काठमाडौं । सिंहदरबारस्थित नयाँ संसद् भवनमा प्रतिनिधिसभा र राष्ट्रिय सभाका बैठक कक्षहरू तयार हुन अझै एकदेखि दुई महिनासम्म लाग्न सक्ने भएको छ ।

प्रतिनिधिसभा हल तयार नहुने भएपछि सहरी विकास तथा भवन निर्माण विभागले कामचलाउका रूपमा बहुउद्देश्यीय हल तयार पारिरहेको छ । उक्त हल तीन सय जना अट्ने क्षमताको छ । सोही हलमा नयाँ सांसदहरूलाई शपथ गराउने र केही बैठक पनि राख्ने तयारी गरेको छ ।

बिहीबार राष्ट्रिय सभा अध्यक्ष नारायणप्रसाद दाहालले निर्माणाधीन संघीय संसद भवनको आकस्मिक अनुगमनमा गएका थिए । अनुगमनका क्रममा अध्यक्ष दाहालले राष्ट्रिय सभा र प्रतिनिधि सभा हलका साथै मल्टिपर्पोज हलको अवस्थाका बारेमा जानकारी लिए ।

सोही क्रममा सहरी विकास मन्त्रालयका अधिकारीहरूले प्रतिनिधिसभा र राष्ट्रिय सभाका बैठक कक्षहरू तयार हुन अझै १/२ महिना लाग्ने बताएका हुन् ।

वैकल्पिक रूपमा काम गर्दै गरेको मल्टिपर्पोज हललाई सभाकक्षका रूपमा शनिबारसम्म निर्माण गरिसक्ने पनि उनीहरूले बताएका छन् । जहाँ नयाँ सांसदहरूको शपथ हुनेछ ।

राष्ट्रिय सभा अध्यक्ष दाहालले बनिरहेको मल्टिपर्पोज हलको प्रगतिका बारेमा पनि जानकारी लिए । अनुगमनका क्रममा अध्यक्ष दाहालले नवनिर्वाचित सदस्यहरूको शपथ ग्रहण र त्यसपछि प्रतिनिधि सभाको बैठकका लागि सबै तयारी गर्न निर्देशन दिए ।