राज्यका अंगले गरेका काम कानुनसम्मत छन्, हस्तक्षेप हुँदैन : सरकार प्रवक्ता

१६ चैत, काठमाडौं । सरकारले एमाले अध्यक्ष एवं पूर्वप्रधानमन्त्री केपी शर्मा ओली र कांग्रेस नेता एवं पूर्वगृहमन्त्री रमेश लेखकलाई गौरीबहादुर कार्की आयोगको प्रतिवेदन अनुसार पक्राउ गरिएको प्रष्टीकरण दिएको छ ।

मन्त्रिपरिषद्को सोमबारको बैठकपछि सरकारका प्रवक्ता एवं शिक्षा, विज्ञान तथा प्रविधि मन्त्री सस्मित पोखरेलले प्रतिवेदन अनुसार गरेको बताए ।

‘हामी संवेदनशील छौँ । कानुनी प्रक्रिया अनुसार हुन्छ,’ उनले भने, ‘गौरीबहादुर कार्की आयोगको प्रतिवेदन अनसार गरेको हो ।’

एमालेले भने अध्यक्ष ओलीको पक्राउलाई प्रतिशोध भएको आरोप लगाएको छ । तर सरकारले भने नियमसंगत भएको स्पष्ट पारेको छ ।

गत २३ र २४ भदौमा जेनजी आन्दोलनमा तत्कालीन सरकार प्रमुख ओली र गृहमन्त्री लेखक थिए । त्यसबेला सरकारले आन्दोलनमा दमन र बल प्रयोग गरेको भनिएको छ ।

अध्यक्ष ओली पक्राउ परेपछि एमालेभने सडकमा प्रदर्शन गरिरहेको छ । बालेन शाह प्रधानमन्त्रीमा नियुक्त भएको भोलिपल्ट बिहान ओली र लेखक पक्राउ परेका थिए ।

‘भदौ २४ गतेको घटनाको कुरा आइरहेको छ । यस दिनको घटनाको धेरै पक्राउ परिसकेको अवस्था छ । धेरैलाई मुद्दा चलिसकेको छ । २३ गतेको घटनाको कोही पनि पक्राउ परेका थिएनन्,’ मन्त्री पोखरेलले भने, ‘हामीले प्रतिवेदनअनुसार कार्यान्वयन गरेका हौं । राज्यका निकाय र अंगले गर्ने कामहरू कानुनसम्मत हुन्छन्, हामी हस्तक्षेप गर्दैनौं ।’