यूएईमा ड्रोन अवशेष खस्दा घाइते भएका ७ नेपाली ‘डिस्चार्ज’

News Summary

Generated by OK AI. Editorially reviewed.

यूएईको अबजान क्षेत्रमा ड्रोन अवशेष खस्दा घाइते भएका सातै जना नेपाली उपचारपछि डिस्चार्ज भएका छन्।
परराष्ट्र मन्त्रालयका प्रवक्ता लोकबहादुर पौडेल क्षेत्रीले सबै घाइते डिस्चार्ज भइसकेको जानकारी दिए।
यूएईस्थित नेपाली दूतावासले सबै घाइतेसँग सम्पर्क गरी घटनाबारे जानकारी लिएको थियो।

२२ चैत, काठमाडौं । युनाइटेड अरब इमिरेट्स (यूएई) मा ड्रोन अवशेष खस्दा घाइते भएका सातै जना नेपाली डिस्चार्ज भएका छन् । शुक्रबार अबुधाबीको अबजान क्षेत्रमा ड्रोनको अवशेष खस्दा ७ जना नेपाली सहित १२ जना घाइते भएका थिए ।

घाइतेहरू उपचारपछि ‘डिस्चार्ज’ भइसकेको परराष्ट्र मन्त्रालयले जनाएको छ । ६ जना यसअघि नै डिस्चार्ज भएका थिए भने १ जनाको हातमा चोट लागेका कारण उपचार गराइरहेका थिए ।

ती व्यक्ति डिस्चार्ज भइसकेको परराष्ट्र मन्त्रालयका प्रवक्ता लोकबहादुर पौडेल क्षेत्रीले बताए । गम्भीर घाइते भएका व्यक्तिको हातमा चोट लागेको थियो । तर, उनी पनि उपचारपछि डिस्चार्ज भइसकेको प्रवक्ता क्षेत्रीले बताए ।

यूएईस्थित नेपाली दूतावास र परराष्ट्र मन्त्रालयले घटनालाई गम्भीर रूपमा लिँदै चासो देखाएको थियो । दूतावासले घाइते भएका सबैसँग सम्पर्क गरेर घटनाबारे जानकारी लिएको थियो ।