खाडीमा रहेका नेपालीलाई सुरक्षित फिर्ताका लागि कूटनीति पहल गरियोस् : गीता गुरुङ

News Summary

Generated by OK AI. Editorially reviewed.

नेपाली कांग्रेसकी सांसद गीता गुरूङले पश्चिम एसियामा जारी युद्धका कारण डरमा रहेका नेपालीहरूको सुरक्षित घर फिर्तीका लागि सरकारसँग कूटनीतिक पहल गर्न माग गरिन्।
सांसद गुरूङले महिलामाथि भइरहेको साइबर बुलिङ रोक्न दोषीलाई कडा कारबाही गर्न सरकारसँग जोडदार माग गरिन्।
उनले राष्ट्रिय स्वतन्त्र पार्टीले संविधानको मर्मअनुसार समुन्नत नेपाल निर्माणमा अहम् भूमिका खेल्ने अपेक्षा राखेको बताइन्।

२४ चैत, काठमाडौं । नेपाली कांग्रेसकी सांसद गीता गुरूङले खाडी मुलुकमा रहेका नेपालीहरूको सुरक्षित घर फिर्तीका लागि कूटनीतिक पहल गर्न सरकारसँग माग गरेकी छन् ।

प्रतिनिधिसभाको मंगलबारको बैठकमा बोल्दै उनले सरकारसँग पश्चिम एसियामा जारी युद्धका कारण डरमा बाँचिरहेका नेपालीहरूको सुरक्षित घर फिर्तीका लागि कूटनीतिक पहल गर्न माग गरेकी हुन् ।

‘पश्चिम एसियामा जारी युद्धको कारण डरमा बाँचिरहेका नेपालीहरूको सुरक्षित घर फिर्तीका लागि सरकारको अविलम्ब कुटनैतिक पहलका लागि माग गर्दछु,’ सांसद गुरूङले भनिन् ।

सांसद गुरूङले महिलाहरूमाथि भइरहेको साइबर बुलिङ रोक्न दोषीलाई कडा कारबाही गर्न पनि सरकारसँग माग गरिन् ।

‘आफ्ना धारणा अभिव्यक्त गरेकै आधारमा महिलाहरूमाथि भइरहेको निकृष्ट साइबर बुलिङ रोक्न दोषीलाई कडा कारबाही गर्न जोडदार माग गर्दछु,’ उनले भनिन् ।

कांग्रेस सांसद गुरूङले राष्ट्रिय स्वतन्त्र पार्टी (रास्वपा) ले संविधानको मर्मअनुसार समुन्नत नेपाल निर्माणमा अहम् भूमिका खेल्न अपेक्षा राखेको पनि बताइन् ।
‘रास्वपाले प्राप्त गरेको लोभलाग्दो जनमतका लागि बधाई दिँदै उहाँहरूले संविधानको मर्मअनुसार समुन्नत नेपाल निर्माणमा अहम् भूमिका खेल्नुहुनेछ भन्ने अपेक्षा गर्दछु,’ उनले भनिन् ।