पाँचौ ग्रामीण चलचित्र महोत्सवमा १७ फिल्म देखाइने (सूचीसहित)

News Summary

Generated by OK AI. Editorially reviewed.

ग्रामीण चलचित्र महोत्सवले कथानक, भाषाभाषी र छोटा फिल्म विधामा आधिकारिकरुपमा १७ वटा फिल्म छनोट गरेको छ।
महोत्सव बैशाख १५ देखि १७ गतेसम्म सर्लाहीको चन्द्रनगर गाउँपालिकामा निःशुल्क आयोजना हुने भएको छ।
यसवर्ष ५० भन्दा बढी फिल्मको आवेदन परेकोमा १७ वटा छनोट गरिएको र यो महोत्सव पहिलो पटक तराईमा आयोजना हुन लागेको छ।

काठमाडौं । ग्रामीण चलचित्र महोत्सवले आधिकारिकरुपमा छनोट भएका फिल्मको सूची सार्वजनिक गरेको छ । कथानक, भाषाभाषी र छोटा फिल्म विधामा लाइनअप घोषणा गरिएको हो ।

कथानक फिल्मतर्फ मोहर, गुन्यु चोलो, सिटामोल, माइतीघर र कोशेढुंगा छनोट भएका छन् । भाषाभाषीका फिल्मतर्फ इहिरी, सेमिफुङ, नाकछोङ, सब्रे म्रु र बहौरिया छन् ।

छोटो फिल्मतर्फ थरी माइलाको भेजिटेबल गार्डन, अभिभारा, खिल, चाह के रङ्ग, भोटको मोल, नीलो आकाश र लौलासा छन् । सर्लाहीको चन्द्रनगर गाउँपालिकामा आयोजित पत्रकार सम्मेलनमा यो सूची सार्वजनिक गरिएको हो ।

महोत्सव बैशाख १५ देखि १७ गतेसम्म चन्द्रनगर गाउँपालिकामा आयोजना हुने भएको छ । पत्रकार सम्मेलनमा महोत्सव अध्यक्ष रघुनाथ सापकोटा, गाउँपालिका अध्यक्ष राजकुमार महतो लगायत सर्लाहीका पत्रकार सहभागी थिए ।

‘हिमाल, पहाड, तराई, कोही छैन पराई’ भन्ने मूल नारासहित यसअघि लाप्राक, गोसाईकुण्ड, भकुण्डेबेसी र रामेछापमा आयोजना भइसकेको यो महोत्सव पहिलो पटक तराईमा हुन लागेको हो ।

यसवर्ष तीन विधाको लागि ५० भन्दा बढी फिल्मको आवेदन परेकोमा १७ वटा छनोट गरिएको छ । दर्शकले फिल्मलाई निःशुल्करुपमा हेर्न पाउने भएका छन् ।