संस्थापन समूहले हामीले जित्यौँ भनेर होइन, एकताबद्ध हुनेबारे सोच्नुपर्छ : श्याम घिमिरे

News Summary

Generated by OK AI. Editorially reviewed.

नेपाली कांग्रेसका नेता श्याम घिमिरेले पार्टीलाई एक बनाएर लैजाने जिम्मा वर्तमान संस्थापन पक्षको भएको बताएका छन्।
घिमिरेले गगनजीले सबैलाई समेट्ने ढंगले अग्रसरता लिनुपर्ने र विशेष महाधिवेशनभन्दा बाहिर रहेकाहरूलाई समेट्नुपर्ने बताए।
उनले पार्टी कमजोर भएको अवस्थामा वर्तमान संस्थापन पक्षले पार्टी एकताबद्ध गरेर लैजान सबैले साथ दिनुपर्ने उल्लेख गरे।

६ वैशाख, काठमाडौं । नेपाली कांग्रेसका नेता श्याम घिमिरेले पार्टीलाई एक बनाएर लैजाने जिम्मा वर्तमान संस्थापन पक्षको भएको बताएका छन् ।

आज आइतबार शेरबहादुर देउवा समूहका पूर्वकेन्द्रीय सदस्यहरूको भेलामा सहभागी भएर निस्किएका घिमिरेले यस्तो बताएका हुन् ।

‘अब मुद्दामामिलाको कुरा सकिएको छ । राजनीतिक रुपमा पार्टीलाई एकताबद्ध गरेर लैजानुपर्नेछ,’ उनले भने, ‘गगनजीले सबैलाई समेट्ने ढंगले अग्रसरता लिनुपर्छ । विशेष महाधिवेशनभन्दा बाहिर रहेकाहरूलाई कसरी समेटेर जानुपर्छ भन्ने कुरा उहाँमा निर्भर छ ।’

उनले देउवा पक्षले पनि पार्टी एकता कसरी सुदृढ बनाउने भन्नेबारे काम गर्नुपर्ने बताए । ‘पार्टी कमजोर भएको अवस्था छ । सँगसँगै वर्तमान संस्थापन पक्षले पनि हामीले जित्यौँ, हामी भइसक्यौँ भन्ने बिर्सेर पार्टीलाई एकताबद्ध गरेर लैजानुपर्छ यसमा सबैले साथ दिनुपर्छ’ उनले भने ।