नाटक ‘लुसिफर राइजिङ’को विवाद : लेखक तथा निर्देशक सहलेशलाई हटाइयो

१७ जेठ, काठमाडौं । थापागाउँस्थित एक थिएटर नेपालमा मञ्चन भइरहेको नाटक लुसिफर राइजिङका लेखक तथा निर्देशक सहलेशलाई नाटकबाट हटाइएको छ ।

निर्माण पक्ष ‘मझुवा बगर जनकला मञ्च’ले शनिबार विज्ञप्ति जारी गर्दै उनलाई संस्थाको जिम्मेवारीबाट निलम्बन गर्नुका साथै भविष्यका कुनै पनि परियोजनामा सहभागी हुन नपाउने गरी पूर्णप्रतिबन्ध लगाएको हो ।

गत जेठ १ गतेदेखि मञ्चन सुरु भएको यस नाटकका निर्देशक सहलेशमाथि संस्थाको मूल मर्मविपरीत काम गरेको र गम्भीर अनुशासन उल्लंघन गरेको आरोप लागेको छ । उनले संस्थालाई उपलब्ध गराएको आधिकारिक स्क्रिप्टभन्दा बाहिर गएर नाटकमा अनावश्यक थपघट गरेको र अत्यधिक अश्लील शब्दहरूको प्रयोग गरेको आरोप समेत लगाइएको छ ।

यो पनि पढ्नुहोस

‘लुसिफर राइजिङ’ को लफडा : नेपथ्यमा भएको के थियो ?

यति मात्र नभई निर्देशकले सरकार विरुद्ध अनावश्यक अफवाह फैलाएको र आफूलाई सुरक्षा थ्रेट आएको दाबी गरे पनि त्यसको कुनै ठोस प्रमाण बुझाउन नसकेको निर्माण पक्षको जिकिर छ ।

संस्थाको आधिकारिक सामाजिक सञ्जालको दुरुपयोग गरी भ्रामक विज्ञप्ति जारी गरेको तथा समग्र नाट्य जगतकै अपमान हुने गरी गतिविधि सञ्चालन गरेको कारण उनलाई तत्कालै पदमुक्त गरिएको विज्ञप्तिमा उल्लेख छ । नाटकको अन्त्यमा कालो भादगाउँले टोपी र कालो चस्मा लगाएको नयाँ पात्रलाई अनपेक्षित रूपमा प्रवेश गराउनुलाई पनि संस्थाले बर्खास्ततीको एउटा कारण मानेको छ।

यो पनि पढ्नुहोस

२४ भदौमा फर्काउने यो नाटक, कसले जन्माउँदै छ लुसिफर !

निर्देशकको बर्खास्तीसँगै केही दिन अन्योलमा परेको नाटक भोलि जेठ १७ गतेदेखि पुनः मञ्चन हुने भएको छ । अब यस नाटकको नेतृत्व कलाकार बुद्धिराम चौधरीले गर्नेछन् ।

नयाँ स्वरूपमा मञ्चन हुन लागेको यस नाटकको नाम अब ‘लुसिफर राइजिङ २.०: ए जेन-जी प्ले’ राखिएको छ। बर्खास्तीबारे अनलाइनखबरले सहलेससँग बुझ्न खोज्दा उनीसँग सम्पर्क हुन सकेन ।