प्रधानमन्त्रीको भ्रमणका सूचना लुकाउँछ उनको सचिवालय

५ भदौ, काठमाडौं । प्रधानमन्त्री बालेन्द्र शाहको सचिवालयले प्रधानमन्त्रीले काठमाडौंबाहिर भ्रमण गरेका विषयहरू हरसम्भव लुकाउने प्रयास गर्दैआएको छ ।

प्रधानमन्त्री शाह काठमाडौंबाहिर जाँदा पुग्ने स्थानहरू, भेट्ने व्यक्तिहरू लगायतमा सचिवालयले औपचारिक धारणा बाहिर ल्याएको हुँदैन । प्रधानमन्त्री शाह पोखरा भएर मुस्ताङ जाने सूचना आइसकेपछि पनि पोखराको बसाइँबारे सचिवालयले केही जानकारी गराएन । प्रधानमन्त्री शाह स्थलमार्ग हुँदै शुक्रबार बिहान पोखराका लागि हिँडे । उनीसँग रहेका अन्य व्यक्तिहरूको जानकारी गराइएको छैन ।

प्रधानमन्त्री स्थलमार्गबाट पोखरा जान लागेको विषयको पुष्टिको लागि उनको सचिवालयका एक सदस्यलाई फोन गर्दा सुरक्षा कारणले भन्न नमिल्ने बताए । उनले अनलाइनखबरसँग भने, ‘स्थलमार्ग वा हवाई मार्गबाट पोखरा जानुभएको हो भन्ने विषय सुरक्षा कारणले भन्न मिल्दैन ।’

सुरक्षाको कारण भन्न नमिल्ने उनले बताउँदा–बताउँदै प्रधानमन्त्री शाहसहित सुरक्षाकर्मीका गाडीको लस्करको भिडियो धादिङमा देखियो ।

प्रधानमन्त्री पोखरा र मुस्ताङ जाने विषय त्यहाँका जिल्लाका प्रशासन प्रमुखलाई समेत थाहा दिइएको छैन । मुस्ताङकी प्रमुख जिल्ला अधिकारी अजिता शर्माले प्रधानमन्त्री आउने कुरा मिडियामार्फत जानकारी पाएको बताइन् ।

‘हिजोदेखि नै यो खबर आइरहेको छ कि प्रधानमन्त्री मुस्ताङ भ्रमणमा आउँदै हुनुहुन्छ,’ मुस्ताङकी सीडीओ शर्माले भनिन्, ‘तर, औपचारिक जानकारी, कार्यक्रम तालिका हामीकहाँ आइपुगेको छैन ।’

प्रधानमन्त्री पोखरामा बस्ने स्थान तय भइसक्दा समेत कास्कीका प्रमुख जिल्ला अधिकारी कुमानसिंह गुरुङले औपचारिक जानकारी पाएका छैनन् । कास्की प्रजिअ गुरुङले पनि मिडियाबाट नै थाहा पाएको जानकारी गराए ।

‘हामीले पनि मिडियाबाटै थाहा पाइरहेका छौं । औपचारिक जानकारी आएको छैन, प्रधानमन्त्री नै आउने भएपछि पक्कै जानकारी आउला,’ गुरुङले भने, ‘स्थलमार्ग भएर आउने भन्ने थाहा पाइयो । अरू जानकारी पनि आउला भन्ने विश्वास छ ।’

प्रधानमन्त्री बालेन बस्नका लागि कास्कीको माछापुच्छ्रे गाउँपालिकाको धिताल अस्तामस्थित अन्नपूर्ण इको भिलेज बुक गरिएको छ । स्रोतका अनुसार अन्नपूर्ण इको भिलेजका सबै कोठा बुक गरिएको छ । तर सुरक्षा संयन्त्रले भने अहिलेसम्म पनि बेखबर भएको बताइरहेका छन ।

रास्वपाको प्रथम महाधिवेशनको बेला चितवनमा प्रधानमन्त्री बस्ने स्थानको बारेमा समेत  प्रधानमन्त्रीको सचिवालयले जानकारी बाहिर ल्याएन । चितवनमा तीन दिन बस्दा प्रधानमन्त्री शाह कालिका नगरपालिका–९ शक्तिखोरस्थित लटौली सेञ्चुरी रिसोर्टमा बसेका थिए । रिसोर्टका १६ वटा कोठा बुक गरिएको थियो ।

यसअघिका प्रधानमन्त्रीहरुको भ्रमणबारे प्रेस र आम जानकारीका लागि बाहिर सूचना दिने चलन थियो । तर, आम सूचनामा रहनुपर्ने प्रकृतिका भ्रमण र तिनको औचित्यबारे हाल प्रधानमन्त्री कार्यालय तथा सचिवालयले सूचना लुकाउन थालेका हुन् ।