ट्रम्पले इजरायललाई २६ हजार करोड रुपैयाँका हतियार दिने, मानवीय क्षतिको डरले बाइडेनले रोकेका थिए

३१ भदौ, काठमाडौं । अमेरिकी राष्ट्रपति डोनाल्ड ट्रम्पको प्रशासनले इजरायललाई २.८ अर्ब डलर बराबरका हतियार दिने तयारी गरिरहेको छ। यो प्याकेजमा करिब ४० हजार वटा भारी बम समावेश छन्।

प्रत्येक बमको तौल २ हजार पाउन्ड अर्थात् करिब ९०० किलो छ। यी बमको आपूर्तिमा पूर्वराष्ट्रपति जो बाइडेनले सन् २०२४ मा रोक लगाएका थिए।

प्रस्तावित हतियार प्याकेजमा २० हजार एमके–८४ र २० हजार बीएलयू–११७ बम छन्। सम्झौता भने अहिलेसम्म अन्तिम भइसकेको छैन।

अमेरिकी अधिकारीहरूका अनुसार यसबारे अमेरिकी कांग्रेसलाई अनौपचारिक जानकारी दिइसकिएको छ।

गाजामा ठूलो मानवीय क्षति हुने डरले रोकिएको थियो आपूर्ति

सन् २०२४ मा बाइडेन प्रशासनले २ हजार पाउन्डका यी बमको एक खेप इजरायल पठाउन रोक लगाएको थियो। त्यतिबेला गाजाजस्तो घना बस्ती भएको क्षेत्रमा यी बम प्रयोग गर्दा ठूलो संख्यामा मानिसको ज्यान जान सक्ने चिन्ता व्यक्त गरिएको थियो।

ट्रम्प पुनः राष्ट्रपति बनेपछि उक्त रोक हटाइएको थियो। अहिले उनको प्रशासनले यिनै बमको ठूलो परिमाण समावेश भएको नयाँ हतियार सम्झौताको तयारी गरिरहेको छ।

यी करिब ९०० किलोका बमका विभिन्न मोडल छन्। केही जमिनमुनि रहेका संरचनालाई निशाना बनाउन डिजाइन गरिएका छन् भने केही जमिनमाथि विस्फोट भएर ठूलो क्षेत्रमा क्षति पुर्‍याउन सक्छन्।

विशेषज्ञहरूले गाजामा भएका हमलाका भिडियो तथा घटनास्थलबाट प्राप्त बमका टुक्राहरूको विश्लेषण गरेका छन्। उनीहरूका अनुसार त्यहाँ अमेरिकी निर्मित बमको प्रयोग भएको देखिन्छ।

यीमध्ये केही बम हमासको सुरुङ सञ्जाललाई निशाना बनाउन प्रयोग गरिएको बताइएको छ। तर, घना बस्ती भएका क्षेत्रमा भएका हमलामा सर्वसाधारणको समेत मृत्यु भएको छ।

ट्रम्पले यसअघि पनि अर्बौं डलरका हतियार दिएका थिए

ट्रम्प प्रशासनले गत वर्ष इजरायलका लागि करिब ३ अर्ब डलर बराबरको हतियार बिक्री स्वीकृत गरिसकेको थियो। त्यसमा ३५ हजार ५०० भन्दा बढी भारी बम समावेश थिए।

त्यसपछि जनवरीमा इजरायलका लागि थप ६.६७ अर्ब डलर बराबरको हतियार बिक्रीलाई स्वीकृति दिइएको थियो।

७ अक्टोबर २०२३ मा हमासको नेतृत्वमा दक्षिणी इजरायलमा हमला भएको थियो। उक्त हमलामा करिब १,२०० जनाको मृत्यु भएको र २५१ जनालाई बन्धक बनाइएको थियो। त्यसपछि इजरायलले गाजामा सैन्य अभियान सुरु गरेको थियो।

गाजाको स्वास्थ्य मन्त्रालयका अनुसार इजरायली सैन्य अभियानमा हालसम्म ७३ हजार २६४ भन्दा बढी प्यालेस्टिनीको मृत्यु भएको छ। यो तथ्याङ्कमा युद्धविरामपछि मारिएका व्यक्तिहरू पनि समावेश छन्।

अमेरिकाको मध्यस्थतामा युद्धविराम भएको भए पनि गाजामा हिंसा पूर्ण रूपमा रोकिएको छैन। इजरायलतर्फबाट हमला जारी रहनुका साथै हमाससँग सम्बन्धित लडाकु र इजरायली सैनिकबीच पनि हिंसाका घटना भइरहेका छन्।

(एजेन्सीहरूको सहयोगमा)