नेपालमा छायांकन भएको हलिउड फिल्म ‘तेन्जिङ’ को ट्रेलर सार्वजनिक

लस एन्जलस (भेराइटी) । विश्वको सर्वोच्च शिखर सगरमाथाको पहिलो सफल आरोहणको ऐतिहासिक यात्रामा आधारित हलिउड फिल्म ‘तेन्जिङ’को पहिलो ट्रेलर सार्वजनिक भएको छ ।

‘हामी ३० वर्षदेखि यो हिमाल चढ्ने प्रयास गरिरहेका छौं,’ ट्रेलरमा सेनाका कर्नेल जोन हन्ट भेला भएका आरोहीलाई भन्छन्, ‘सबैभन्दा पहिले माथि पुग्न बेलायत हामीमाथि निर्भर छ ।’

त्यो हिमाल हो, विश्वकै अग्लो सगरमाथा । जोन हन्टको भूमिकामा विलेम डाफो छन् । हन्टले सगरमाथाको पहिलो सफल आरोहण अभियानको नेतृत्व गरेका थिए । आरोहण टोलीमा न्युजिल्यान्डका एडमन्ड हिलारी पनि थिए, जसको भूमिका टम हिडलस्टनले निर्वाह गरेका छन् ।

सन् १९५३ मा सगरमाथाको चुचुरोमा पहिलोपटक पुग्ने दुई आरोहीमध्ये अर्का थिए तेन्जिङ नोर्गे । फिल्ममा उनको भूमिका गेन्डेन फुन्त्सोकले निर्वाह गरेका छन् ।

फिल्मले तेन्जिङलाई सगरमाथालाई ‘अरू कसैले भन्दा राम्रोसँग चिन्ने’ र बाल्यकालदेखि नै त्यसबारे सोच्न नछाडेका प्रतिभाशाली शेर्पाका रूपमा प्रस्तुत गरेको छ ।

तेन्जिङ, हिलारी र हन्ट सन् १९३० को दशकदेखि सगरमाथा आरोहणको प्रयासमा संलग्न ब्रिटिस अभियानसँग जोडिएका थिए । फिल्मले करिब दुई दशकपछि प्राप्त उनीहरूको कठिन र जोखिमपूर्ण सफलताको कथा पछ्याउँछ ।

फिल्मको आधिकारिक कथासारअनुसार पत्नी दावा (थिन्ले ल्हामो)को प्रोत्साहन पाएका तेन्जिङले अभियानकी सचिव जिल हेन्डरसन (कैट्रिओना बाल्फ)लाई सहयोगीका रूपमा पाउँछन् । उनीहरू मिलेर हन्टलाई तेन्जिङ ब्रिटिस आरोहण टोलीको सेवा गर्ने व्यक्ति मात्र नभई आरोहीकै रूपमा टोलीमा समावेश हुनुपर्नेमा सहमत गराउँछन् ।

पश्चिमी आरोहीले ‘एभरेस्ट’लाई जित्नुपर्ने लक्ष्यका रूपमा हेर्दा तेन्जिङ भने ‘चोमोलुङ्मा’लाई पवित्र मातृदेवीका रूपमा श्रद्धा गर्छन् ।

त्यसपछि सुरु हुने आरोहणमा हिमालको जोखिमसँगै फरक पृष्ठभूमि, वर्ग र प्रतिस्पर्धी महत्वाकांक्षाबीचको तनाव पनि उत्तिकै महत्वपूर्ण बनेर आउँछ । तर संसारभन्दा निकै माथि पुगेपछि साम्राज्य, पद र महत्वाकांक्षा गौण बन्छन् । आपसी सम्मान र विश्वासले दुई फरक पृष्ठभूमिका आरोहीलाई जोड्छ । तेन्जिङका लागि यो यात्रा जीवनभरको सपना र आध्यात्मिक आह्वान दुवैको पूर्णता बन्छ ।

‘तेन्जिङ’लाई अस्ट्रेलियाली निर्देशक जेन्निफर पिडमले निर्देशन गरेकी हुन् । उनले सन् २०१५ को बाफ्टा मनोनित वृत्तचित्र ‘शेर्पा’ पनि निर्देशन गरेकी थिइन् ।

त्यसको एक वर्षअघि उनी सगरमाथाका शेर्पाबारे वृत्तचित्र निर्माणमा काम गरिरहेकी थिइन् । त्यही बेला सगरमाथामा गएको विशाल हिमपहिरोमा १६ तिब्बती पर्वतीय पथप्रदर्शकको मृत्यु भएको थियो ।

‘तेन्जिङ’ यसै महिना टेलुराइड फिल्म फेस्टिभलमा प्रिमियर भएको थियो । फिल्म टोरन्टोमा पनि प्रदर्शन भइरहेको छ भने सेप्टेम्बर २४ मा जुरिच फिल्म फेस्टिभलको उद्घाटन फिल्मका रूपमा प्रदर्शन हुनेछ ।

फिल्म अक्टोबर ९ देखि हलमा प्रदर्शनमा आउनेछ । त्यसको एक सातापछि ‘तेन्जिङ’ एप्पल टिभीमा स्ट्रिमिङ सुरु हुनेछ ।