यो सेप्टेम्बरमा रिलिज भएका ९ उत्कृष्ट टिभी सिरिजहरू

मनोरञ्जन प्रेमीहरूका लागि यो सेप्टेम्बर महिना निकै खास र रोमाञ्चक भइरहेको छ । नेटफ्लिक्स, एप्पल टिभी, पारामाउन्ट प्लस, हुलु र डिज्नी प्लस जस्ता ओटिटी प्लेटफर्महरूमा थ्रिलर, क्राइम, रोमान्टिक कमेडी र हरर जस्ता विभिन्न विधाका नयाँ तथा चर्चित सिरिजहरू प्रदर्शन भइरहेका छन् । केके छन् त सेप्टेम्बर महिनामा आएका हेर्नैपर्ने केही टिभी सिरिजहरू ?

१. द जेन्टलमेन

गाई रिचीको सन् २०१९ को चर्चित फिल्ममा आधारित यो सिरिजको दोस्रो सिजन आएको छ । मुख्य पात्र एड्डी (थियो जेम्स) ले आफ्नो बुबाको सम्पत्तिसँगै घर र त्यसैको जग्गामा चलेको गाँजा फार्मको जिम्मेवारी पाएका थिए । यस सिजनमा एड्डी सुजी (काया स्कोडेलारियो) र उनका बुबा बबीसँग मिलेर अपराधको दुनियाँमा पूर्ण रूपमा सक्रिय हुन्छन् ।

यसपटक कथा बेलायतबाट इटालीसम्म पुग्छ, जहाँ नयाँ र खतरनाक अपराधका नाइकेहरूसँग उनीहरूको सामना हुनेछ ।

२. लास्ट सिन

अस्ट्रेलियाको भिक्टोरियामा छायांकन गरिएको यो सिरिज सस्पेन्स र भावनाले भरिएको छ । प्याट्रिक ब्राभेलले इयान रिडले नामका एक पूर्वप्रहरी अधिकारीको भूमिका निभाएका छन् । ११ वर्षअघि उनको ३ वर्षीया छोरी अपहरण भएकी थिइन्, जसको कुनै अत्तोपत्तो पाइएन । यसै घटनाका कारण उनको वैवाहिक जीवन टुट्छ र उनी रक्सीको लतमा फस्छन् ।

तर एक दिन फोन कलमा एक युवतीले आफू उनकै हराएकी छोरी भएको बताएपछि कसैले विश्वास नगरे पनि सत्य पत्ता लगाउन पुनः खोजीमा जुट्छन् । यो थ्रिलर, सस्पेन्स विधामा आधारित फिल्म हो ।

३. कोलिन फ्रम अकाउन्ट्स – सिजन ३

सिड्नी शहरमा आधारित यो रोमान्टिक कमेडी सिरिजको यो तेस्रो तथा अन्तिम सिजन हो । यो सिरिज वास्तविक जीवनका जोडी प्याट्रिक ब्राभेल र ह्यारिएट डायरले लेखेका र अभिनय गरेका हुन् । एउटा कुकुरलाई सँगै हुर्काउने क्रममा नजिकिएका गार्डन (भट्टीका मालिक) र एश्ली (मेडिकलकी छात्रा) को वरिपरि कथा घुम्छ ।

अघिल्लो सिजनको अन्त्यमा एश्लीले विवाहको प्रस्ताव अस्वीकार गरेकी थिइन् । ३ वर्षपछि उनीहरूको पुनः भेट भएपछि सम्बन्धमा कस्ता उतारचढाव आउँछन् भन्ने कुरा यस अन्तिम सिजनमा रमाइलो ढंगले देखाइएको छ ।

४. अगाथा क्रिस्टिज टमी एन्ड टुपेन्स

उपन्यासकार अगाथा क्रिस्टीका चर्चित पात्रहरू टमी र टुपेन्सलाई यस सिरिजमा २१औं शताब्दीको आधुनिक परिवेशमा ढालिएको छ । जासुसी उपन्यास लेख्ने टमी (जोश डिलन) र उनकी कलेजकी पुराना साथी टुपेन्स (एन्टोनिया थोमस) को भेट एउटा साथीको बिहेमा हुन्छ ।

त्यहीँ एउटा हत्या भएपछि उनीहरू मिलेर अनुसन्धान सुरु गर्छन् । र, एउटा नयाँ जासुसी एजेन्सी खोल्छन् । सस्पेन्स, थ्रिलर र उनीहरूबीचको सम्बन्धलाई सिरिजमा निकै रोचक तरिकाले प्रस्तुत गरिएको छ ।

५. मोन्स्टर : द लिजी बोर्डेन स्टोरी

रयान मर्फीको चर्चित मोन्स्टर सिरिजको यो चौथो भाग अमेरिकाको इतिहासकै चर्चित र क्रूर एक हत्याकाण्डमा आधारित छ । सन् १८९२ मा बञ्चरो प्रहार गरी आफ्नै आमाबाबुको हत्या गरेको आरोप लागेकी लिजी बोर्डेनको कथा यसमा प्रस्तुत गरिएको छ । सिरिजमा एला बीटीले लिजीको भूमिका निभाएकी छन् ।

यस सिजनले महिलाको रिस, दबाएर राखिएका भावना र क्रूरतालाई केलाइएको छ । सिरिजमा अन्य चर्चित कलाकारहरू सारा पल्सन र चार्ली हनमको पनि दमदार अभिनय रहेको छ ।

६. स्लो हर्सेस

एप्पल टिभीको लोकप्रिय जासुसी सिरिज स्लो हर्सेसको नयाँ सिजन अझ बढी थ्रिलर र रोमान्चक छ । यस सिजनमा भूतपूर्व एमआई फाइभ जासुसहरूलाई कसैले पालैपालो मारिरहेको हुन्छ । अनुभवी कलाकार ग्यारी ओल्डम्यानले ज्याक्सन ल्याम्ब नामक चलाख तर अलि लथालिंग स्वभावका जासुस प्रमुखको भूमिका निभाएका छन् ।

आफ्ना सहकर्मीहरू खतरामा परेपछि उनीहरू एकजुट भएर ज्यान बचाउन र हत्यारा पत्ता लगाउन खतरनाक मिसनमा लाग्छन् ।

७. ब्रदर्स

हलिउडका स्टार कलाकारहरू म्याथ्यु म्याकोनाहे र वुडी ह्यारेल्सनले यस कमेडी सिरिजमा मुख्य भूमिका निभाएका छन् । वास्तविक जीवनमा उनीहरू सौतेनी दाजुभाइ हुनसक्ने हल्ला चलेको थियो, त्यही प्रसङ्गलाई आधार बनाएर यो काल्पनिक हास्य सिरिज बनाइएको हो ।

सिरिजमा दुवैले आफ्नै जस्तै भूमिका निभाएका छन्, जहाँ बुढी आफ्नो परिवारसहित म्याथ्युको घर टेक्सास घुम्न पुग्छन् । दुई परिवारबीच हुने झगडा, ठट्टा र पारिवारिक सम्बन्धलाई यसमा हास्यपूर्ण रूपमा देखाइएको छ ।

८. अमेरिकन हरर स्टोरी – सिजन १३

हरर शोहरू मन पराउने दर्शकका लागि अमेरिकन हरर स्टोरीको १३औं सिजन निकै विशेष हुनेछ । १३ अंकलाई अलिक डरलाग्दो मानिने भएकाले यस सिजनमा पुराना सबै लोकप्रिय कलाकारहरू पुनः एक ठाउँमा आएका छन् । जेसिका ल्याङ्गले आफ्ना पुराना ४ वटा भूमिका र सारा पल्सनले ६ वटा भूमिका पुनः दोहोर्‍याउनेछन् ।

रयान मर्फीका अनुसार, यो सिजन मार्वेलको द एभेन्जर्स जस्तै हो, जहाँ सबै मुख्य पात्रहरू मिलेर ठूलो दुष्ट शक्तिसँग लड्नेछन् ।

९. अ डिफरेन्ट वल्ड

सन् १९८७ देखि १९९३ सम्म चलेको चर्चित शोको यो नयाँ सिक्वेल (निरन्तरता) हो । हिलम्यान कलेजका नयाँ पुस्ताका विद्यार्थीहरूको कथामा आधारित यस सिरिजमा डेबोराह (मलेया जोई मुन) मुख्य भूमिकामा छिन् ।

कलेज जीवनका नयाँ चुनौती, प्रेम, दोस्ती, र आधुनिक युवाहरूले भोग्ने सामाजिक मुद्दाहरूलाई यस सिरिजमा सरल र रमाइलो ढङ्गले प्रस्तुत गरिएको छ । पुराना लोकप्रिय कलाकारहरूको विशेष उपस्थितिले शोलाई अझ रोचक बनाएको छ ।