भारी वर्षाको सम्भावनापछि स्याङ्जामा उच्च सतर्कता अपनाउन आग्रह

८ असोज, स्याङ्जा । स्याङ्जामा भारीदेखि अति भारी वर्षाको सम्भावना रहेकाले जिल्ला प्रशासन कार्यालयले उच्च सतर्कता अपनाउन आग्रह गरेको छ ।

निरन्तर वर्षाका कारण नदी तथा खोलामा जलसतह बढ्न सक्ने, आकस्मिक बाढी, पहिरो, डुबान तथा नदी किनारमा कटानको जोखिम बढ्ने भन्दै प्रशासनले सर्वसाधारणलाई सावधानी अपनाउन अनुरोध गरेको हो ।

नेपाल मौसम विज्ञान विभाग, मौसम पूर्वानुमान महाशाखाले जारी गरेको मौसमी बुलेटिनका आधारमा जिल्ला प्रशासन कार्यालय स्याङ्जाले यस्तो सूचना जारी गरेको हो ।

सूचनाअनुसार भारतको अण्डमान सागर क्षेत्रमा विकसित न्यूनचापीय प्रणाली शक्तिशाली बन्दै गएको र पश्चिमदेखि उत्तरपश्चिम दिशातर्फ सर्ने क्रममा रहेकाले असोज ८ गते बिहीबारदेखि ११ गतेसम्म स्याङ्जा तथा आसपासका क्षेत्रमा मेघगर्जन, चट्याङ र हावाहुरीसहित भारीदेखि अति भारी वर्षाको सम्भावना छ ।

प्रशासनका अनुसार निरन्तर वर्षाका कारण नदी तथा खोलाको प्राकृतिक बहावमा वृद्धि भई जलसतह बढ्न सक्छ । यसबाट आकस्मिक बाढी आउने, भेल बग्ने, डुबान हुने तथा नदी र खोलाको आसपास पहिरो जाने जोखिम उच्च रहनेछ ।

पानी परेपछि चर्को घाम लाग्दा समेत सुख्खा पहिरो खस्न सक्ने र नदी तथा खोलाको माथिल्लो भागबाट पहिरोसहितको लेदो बगेर आउने सम्भावना रहेकाले नदी तथा खोलाको किनारमा बसोबास गर्नेहरूलाई विशेष सतर्कता अपनाउन आग्रह गरिएको छ ।

प्रशासनले बाढी आउन सक्ने समयमा नदी तथा खोलाको किनारमा माछा मार्ने, पौडी खेल्ने, नुहाउने, लुगा धुने, दाउरा, बालुवा तथा गिट्टी निकाल्ने वा अन्य कुनै गतिविधि नगर्न भनेको छ । बाढी आएको समयमा नदी तथा खोलाको किनारमा राखिएका सामग्री झिक्न नजान र परिवारका सदस्यलाई समेत त्यस्ता स्थानमा जान नदिन आग्रह गरिएको छ ।

त्यस्तै, गाईवस्तु चराउन वा पानी खुवाउन तथा भलिबल, फुटबल, क्रिकेटलगायत बाहिरी खेल खेल्न नदी तथा खोलाको किनारमा नजान प्रशासनले अनुरोध गरेको छ । अभिभावकले बालबालिकामाथि निगरानी राखी उनीहरूलाई जोखिमयुक्त स्थानमा जान नदिनसमेत भनिएको छ ।

नदी तथा खोलाको किनार र होचो भूभागमा बसोबास गर्ने बासिन्दाले पानीको बहाव निरन्तर नियाल्न र जलसतह बढेमा तत्काल सुरक्षित स्थानमा सर्ने व्यवस्था मिलाउनुपर्ने प्रशासनले जनाएको छ । सवारी चालकलाई नदी तथा खोलाको किनारमा पर्ने सडक र बजार क्षेत्रमा सवारीसाधन रोक्न वा पार्किङ नगर्न आग्रह गरिएको छ ।

चट्याङबाट जोगिन घर वा भवनभित्र सुरक्षित बस्न, रुख, बिजुलीका पोल, टावर तथा अन्य अग्ला संरचनामुनि नबस्न प्रशासनले अनुरोध गरेको छ । पोखरी, नदी तथा खोलाबाट टाढा रहन र डाँडाको टुप्पो वा अग्लो स्थानमा नबस्नसमेत आग्रह गरिएको छ ।

प्रशासनले नेपाल मौसम विज्ञान विभाग, संघीय सरकार, प्रदेश सरकार, स्थानीय प्रशासन, स्थानीय तह तथा सुरक्षा निकायबाट जारी हुने आधिकारिक मौसम पूर्वानुमान, पूर्वसूचना र चेतावनीबारे नियमित जानकारी लिन तथा सम्बन्धित निकायका निर्देशन पालना गर्न अनुरोध गरेको छ ।

संघ तथा प्रदेश सरकारका सम्बन्धित निकाय, स्थानीय तह, सुरक्षा निकाय, स्वयंसेवक र अन्य सरोकारवालालाई आवश्यक पूर्वतयारीसहित सतर्क अवस्थामा रहन तथा जोखिममा रहेका नागरिकलाई समयमै सुरक्षित स्थानमा स्थानान्तरण गर्न प्रशासनले आग्रह गरेको छ ।

वर्षा तथा बाढीसम्बन्धी जानकारीका लागि ११५५, विपद् सहायता नम्बर १२३४, नेपाल प्रहरीको १०० तथा सशस्त्र प्रहरी बल, नेपालको १११४ मा सम्पर्क गर्न सकिने जिल्ला प्रशासन कार्यालयले जनाएको छ ।