युवा नेता सुशील भट्ट कांग्रेस केन्द्रीय सदस्यको उम्मेदवार

१९ असोज, काठमाडौँ । युवा नेता सुशील भट्टले नेपाली कांग्रेसको ३५ वर्षमूनिको युवा समूहबाट खुला केन्द्रीय सदस्य पदमा उम्मेदवारी घोषणा गरेका छन्। १५औँ महाधिवेशनमा काठमाडौँ क्षेत्र नं. ७ का महाधिवेशन प्रतिनिधि चयन भएका भट्टले केन्द्रीय सदस्य पदमा उम्मेदवारी घोषणा गरेका हुन्।

भट्टले कांग्रेसलाई नयाँ ऊर्जा, नयाँ सोच र जिम्मेवार पुस्ताको नेतृत्वसँग जोड्ने उद्देश्यले केन्द्रीय सदस्यमा उम्मेदवारी दिएको बताएका छन् ।

आफ्नो उम्मेदवारीबारे उनले आफूलाई कांग्रेसका इमानदार कार्यकर्ताको विश्वास, परिवर्तन चाहने युवाको आवाज तथा अग्रज पुस्ताको अनुभव र मार्गदर्शन रहेको उल्लेख गरेका छन् । उनले सिंगो कांग्रेसलाई आफ्नो टिमका रूपमा लिएको बताएका छन् ।

भट्टले आफूलाई कांग्रेसको ‘जरासँग’ तुलना गर्दै पार्टीलाई बलियो बनाउन आफूले माटोमुनि बसेर काम गर्ने बताएका छन् ।’म जरा नै रहिरहूँ, कांग्रेसको रुख अझ बलियो बनोस्,’उनले भनेका छन् ।

उनले आफ्नो उम्मेदवारी कुनै एक पुस्ताको मात्र नभएको बताएका छन् । ‘बा’देखि युवासम्म र दाइदेखि एआईसम्मलाई जोड्ने डिभाइस बन्न चाहेको उल्लेख गर्दै उनले परम्पराको सम्मान गर्दै परिवर्तनको बाटो रोज्ने अभियान आफ्नो उम्मेदवारी भएको बताएका छन् ।

‘अब कांग्रेसलाई केवल इतिहास सम्झिने होइन, इतिहास बनाउने पुस्तासँगै अघि बढाउने समय हो,’भट्टले भनेका छन् ।

उनले १५औँ महाधिवेशनमा केन्द्रीय सदस्य पदमा आफ्नो उम्मेदवारीलाई महाधिवेशन प्रतिनिधिको माया, विश्वास, साथ र शुभेच्छाले अनुमोदन गरिदिन अपिल गरेका छन् ।

उनले नेविसंघको जहाँ स्कुल त्यहाँ नेविसंघ-२०६५ अभियानमा पनि काम गरेका थिए। त्यस्तै उनी ग्रामीण आदर्श बहुमुखी क्याम्पस नेविसंघ इकाइको पूर्वसभापति पनि हुन्।

नेपाली कांग्रेस काठमाडौं क्षेत्र नम्बर ७ को २०६७ को क्षेत्रीय सदस्य, २०७३ सालमा नेविसंघको निर्वाचित केन्द्रीय सदस्य, कांग्रेसको १४औं महाधिवेशनमा निर्वाचित महाधिवेशन प्रतिनिधि तथा महासमिति सदस्य, परिवर्तन अभियानको संस्थापक अध्यक्ष पनि हुन्।