द ब्रिटिस कलेजको १२ औँ दीक्षान्त समारोह सम्पन्न, सन् २०२६ का स्नातक सम्मानित

२० असोज, काठमाडौं ।  ब्रिटिस एजुकेसन ग्रुपले सन् २०२६ का स्नातकहरूको उपलब्धि मनाउँदै शुक्रबार काठमाडौंको सोल्टी होटलमा संयुक्त दीक्षान्त समारोह आयोजना गरेको छ।

समारोहमा समूहअन्तर्गतका द ब्रिटिस कलेज, ब्रिटिस इन्टरनेसनल कलेज, ब्रिटिस मोडल कलेज र ब्रिटिस प्रोफेसनल कलेजका स्नातक, अभिभावक, प्राध्यापक तथा अतिथिको सहभागिता थियो।

समूहस्तरीय रूपमा आयोजना गरिएको समारोह द ब्रिटिस कलेजको १२औँ दीक्षान्त समारोहसमेत हो। समारोहमा ए लेभलदेखि व्यावसायिक योग्यता तथा व्यवसाय, कम्प्युटिङ, सूचना प्रविधि र लेखाका स्नातक तथा स्नातकोत्तर तहका विभिन्न कार्यक्रम पूरा गरेका विद्यार्थीलाई उपाधि तथा योग्यता प्रदान गरिएको थियो।

समारोहमा कार्यकारी एमबीए, एमबीए, एमएससी आईटी, एमएससी एड्भान्स्ड कम्प्युटर साइन्स, एमएससी प्रोफेसनल एकाउन्टेन्सी, एसीसीए, बीबीए, बीएससी (अनर्स) कम्प्युटिङ, बीएससी (अनर्स) साइबर सुरक्षा तथा डिजिटल फरेन्सिक्स र ए लेभललगायतका कार्यक्रमका विद्यार्थी सहभागी थिए।

समारोह दुई सत्रमा सम्पन्न भएको थियो। स्नातकहरूले समूहका अन्तर्राष्ट्रिय शैक्षिक साझेदार लिड्स बेकेट युनिभर्सिटी, युनिभर्सिटी अफ द वेस्ट अफ इङ्ल्यान्ड, कील युनिभर्सिटी, युनिभर्सिटी अफ लन्डन, एसीसीए र क्याम्ब्रिज इन्टरनेसनलबाट आफ्ना उपाधि तथा योग्यता औपचारिक रूपमा प्राप्त गरे।

कार्यक्रम स्नातकहरूको शैक्षिक जुलुसबाट सुरु भएको थियो। त्यसपछि नेपाल र बेलायतको राष्ट्रगान गाइएको थियो। ब्रिटिस एजुकेसन ग्रुपका समूह प्रमुख कार्यकारी अधिकृत राजेन कंडेलले पारम्परिक रूपमा पनस बालेर समारोहको औपचारिक उद्घाटन गरेका थिए।

स्नातकहरूलाई सम्बोधन गर्दै कंडेलले उनीहरूलाई उपलब्धिका लागि बधाई दिँदै स्नातक, परिवार, प्राध्यापक तथा कलेज परिवारलाई निरन्तर सहयोग र विश्वासका लागि धन्यवाद दिए।

उनले सन् २०२६ का स्नातकहरू द ब्रिटिस कलेजका ४ हजारभन्दा बढी सदस्य रहेको पूर्वविद्यार्थी सञ्जाल तथा ब्रिटिस एजुकेसन ग्रुपका १० हजारभन्दा बढी स्नातक रहेको फराकिलो सञ्जालमा जोडिने बताए।

थप अध्ययन, व्यावसायिक करिअर तथा नयाँ अवसरतर्फ अघि बढ्दा पनि कलेज र सहपाठीसँगको सम्बन्ध कायम राख्न उनले स्नातकहरूलाई आग्रह गरे।

समारोहमा ब्रिटिस एजुकेसन ग्रुपको शैक्षिक तथा अन्तर्राष्ट्रिय सञ्जालका प्रतिनिधिको पनि सहभागिता थियो। द ब्रिटिस कलेजका सल्लाहकार पल क्लिभ्स एमबीई तथा बेलायतस्थित भुटानका प्रथम मानार्थ महावाणिज्यदूत एवं द ब्रिटिस कलेजका पूर्वसल्लाहकार माइकल रटल्यान्ड ओबीईले स्नातकहरूलाई सम्बोधन गर्दै उनीहरूको आगामी शैक्षिक तथा व्यावसायिक यात्राका लागि शुभकामना दिए।

लिड्स बेकेट युनिभर्सिटीका वरिष्ठ प्रवक्ता तथा लिङ्क ट्युटर डेभ चेस्लीले पनि विश्वविद्यालय र द ब्रिटिस कलेजबीचको शैक्षिक साझेदारीको प्रतिनिधित्व गर्दै कार्यक्रममा सहभागिता जनाए।

यस्तै, युनिभर्सिटी अफ द वेस्ट अफ इङ्ल्यान्डका उपकुलपति तथा अध्यक्ष प्रोफेसर स्टिभ वेस्ट सीबीई, कील युनिभर्सिटीका उपकुलपति प्रोफेसर केभिन शेकशेफ र युनिभर्सिटी अफ लन्डनका साइमन क्लियरीले भिडियो सन्देशमार्फत स्नातकहरूलाई बधाई दिए।

समारोहमा शैक्षिक उपाधि प्रदान गर्नुका साथै उत्कृष्ट विद्यार्थी उपलब्धिका लागि उत्कृष्टता पुरस्कारसमेत प्रदान गरिएको थियो। विभिन्न कार्यक्रमका विद्यार्थी प्रतिनिधिले आफ्ना सहपाठीलाई सम्बोधन गर्दै अध्ययन तथा स्नातकसम्मको यात्राका अनुभव साझा गरेका थिए।

द ब्रिटिस कलेजका कन्ट्री डाइरेक्टर अरुण कंडेलको धन्यवाद ज्ञापनपछि समारोह समापन भएको थियो। त्यसपछि स्नातक, अभिभावक, प्राध्यापक तथा अतिथिले सामूहिक रूपमा तस्बिर खिच्दै दीक्षान्त समारोहको उत्सव मनाएका थिए।

ब्रिटिस एजुकेसन ग्रुपका प्रमुख विकास अधिकृत अमरदीप मण्डलले चारवटै संस्थालाई एउटै मञ्चमा ल्याएर स्नातक विद्यार्थीको उपलब्धि मनाउन पाउनु समूहका लागि महत्त्वपूर्ण उपलब्धि भएको बताए।

‘यसले हाम्रो साझा दृष्टिकोण, सामूहिक सामर्थ्य र सीमाभन्दा पर अवसर सिर्जना गर्ने गुणस्तरीय शिक्षा प्रदान गर्ने प्रतिबद्धतालाई प्रतिबिम्बित गर्छ,’ उनले भने, ‘स्नातकहरू व्यावसायिक करिअर र थप अध्ययनतर्फ अघि बढ्दै गर्दा हामी उनीहरूको उपलब्धिप्रति गर्व गर्छौं।’

नेपाल तथा अन्तर्राष्ट्रिय क्षेत्रमा भावी नेतृत्वकर्ता, नवप्रवर्तक र दक्ष व्यावसायिक जनशक्तिका रूपमा स्नातकहरू अघि बढेको हेर्न आफूहरू उत्सुक रहेको उनले बताए।