सिनेमाघरको कोसेली : ‘लाज शरणम्’देखि ‘मायावी’सम्म, घरमै बसेर हेर्नुहोस् यी ८ फिल्म

तपाईं दसैं–तिहारको फुर्सदमा फिल्म हेर्नुहुन्छ? त्यो पनि उच्च गुणस्तरमा? त्यसो हो भने ‘सिनेमाघर’ राम्रो विकल्प हुन सक्छ। सिनेमाघरले दसैंको पूर्वसन्ध्यामा ८ वटा नेपाली फिल्म रिलिज गरेको छ। अनि नाम दिएको छ, ‘दसैं–तिहार मुभी मेला ’।

नेपाली चलचित्रको डिजिटल प्रदर्शनलाई प्रवर्द्धन गर्दै आएको ओटीटी प्लेटफर्म ‘सिनेमाघर’ले यस्तो सौगात ल्याएको हो । यसअन्तर्गत दर्शकले विभिन्न नेपाली चलचित्र घरमै बसेर डिजिटल माध्यमबाट हेर्न सक्नेछन् ।

सिनेमाघरले सार्वजनिक गरेको पोस्टरअनुसार ‘ह्रस्व दीर्घ’, ‘के घर के डेरा : घर नम्बर २’, ‘लाज शरणम्’, ‘मायावी’, ‘कार्साङ’, ‘हरिबहादुरको जुत्ता’, ‘कठपुतली’ र ‘प्रवासी जीवन’ अहिले स्ट्रिमिङमा उपलब्ध छन् ।

प्रविधिमैत्री बन्दै गएको सिनेमाघरले दर्शकको सहजताका लागि विभिन्न माध्यमबाट चलचित्र हेर्न सकिने व्यवस्था मिलाएको छ । गुगल प्ले स्टोर तथा एप्पलको एप स्टोरबाट ‘सिनेमाघर’ एप डाउनलोड गरी स्मार्टफोन वा ट्याब्लेटमा चलचित्र हेर्न सकिन्छ ।

त्यस्तै, ठूलो स्क्रिनमा चलचित्र हेर्न चाहने दर्शकका लागि एन्ड्रोइड टिभी, अमेजन फायर टिभी, सामसुङ स्मार्ट टिभी तथा एलजी वेबओएसमा समेत सिनेमाघर एप प्रयोग गर्न सकिनेछ । मोबाइलबाट क्रोमकास्टमार्फत टिभीमा सामग्री हेर्न सकिने सुविधा पनि प्लेटफर्मले उपलब्ध गराएको छ। कम्प्युटर प्रयोगकर्ताले वेब ब्राउजरमार्फत समेत चलचित्र हेर्न सक्नेछन् ।

दर्शकलाई अझ उच्च गुणस्तरको दृश्य अनुभव दिने उद्देश्यले सिनेमाघरले आफ्नो प्लेटफर्ममा फोरके  स्ट्रिमिङ सुविधा पनि राखेको छ ।

नेपाली चलचित्रलाई डिजिटल माध्यममार्फत विश्वभरका दर्शकमाझ पुर्‍याउने उद्देश्यले सिनेमाघरले पछिल्ला वर्षहरूमा निरन्तर काम गर्दै आएको छ।