दबंग गर्ल सोनाक्षी : १६ वर्षमा ३१ फिल्म, केवल ६ हिट !

बलिउड अभिनेत्री सोनाक्षी सिन्हा चाँडै प्रदर्शनमा आउन लागेको फिल्म ‘तू है मेरी किरण’मा देखिँदै छिन् । फिल्ममा उनी आफ्ना पति तथा अभिनेता जहीर इकबालसँग देखिनेछिन् । यस फिल्मको ट्रेलरसमेत सार्वजनिक भइसकेको छ । पछिल्लो समय सोनाक्षीका थुप्रै फिल्म प्रदर्शनमा आए पनि बक्स अफिसमा अपेक्षित सफलता हासिल गर्न सकेका छैनन् । सुरुवाती दिनमा लगातार सफल फिल्म दिएकी सोनाक्षीको करियरमा पछि कसरी गिरावट आयो ? अब उनको नयाँ फिल्मले करियरलाई पुनः उचाइमा पुर्‍याउन सक्ला ?

सलमानसँग गरिन् सपनाजस्तो डेब्यु

अभिनेत्री सोनाक्षी सिन्हाले अहिलेसम्म ३१ फिल्ममा काम गरिसकेकी छन् । तीमध्ये केही सफल भए भने अधिकांश फिल्मले बक्स अफिसमा राम्रो प्रदर्शन गर्न सकेनन् । सोनाक्षीले सन् २०१० सेप्टेम्बर १० मा प्रदर्शनमा आएको फिल्म ‘दबङ्ग’बाट आफ्नो अभिनय यात्रा सुरु गरेकी थिइन् । यस फिल्ममा उनी सलमान खानसँग देखिएकी थिइन् । फिल्मले बक्स अफिसमा सुपरहिट प्रदर्शन गर्दै १३८.८८ करोड भारतीय रुपैयाँ कमाएको थियो ।

सोनाक्षीका सुरुवाती पाँच फिल्ममध्ये ‘जोकर’बाहेक अन्य चार फिल्मले ठूलो सफलता हासिल गरेका थिए ।

सन् २०१२ सोनाक्षीका लागि निकै विशेष रह्यो । उक्त वर्ष चार सुपरहिट फिल्म दिएपछि उनी बलिउडकी प्रमुख अभिनेत्रीमध्ये एक बन्न सफल भइन् । तर, करियरको सुरुवाती वर्षमा पाएको यो लोकप्रियता लामो समयसम्म कायम रहन सकेन ।

सन् २०१३ पछि ओरालो लाग्यो करियर

सन् २०१२ मा सोनाक्षीका लगभग सबै फिल्म सफल भएका थिए । तर, सन् २०१३ पछि उनको करियरको ग्राफ लगातार ओरालो लाग्न थाल्यो । त्यसपछि उनले करिब २० फिल्ममा काम गरिन्, जसमध्ये एक–दुईबाहेक अधिकांश असफल भए ।

सन् २०१२ पछि सोनाक्षीले मुख्य भूमिकामा रहेर ‘अकीरा’ र ‘निकिता रोय’ जस्ता फिल्ममा पनि काम गरिन् । तर, ती फिल्मले पनि बक्स अफिसमा अपेक्षित सफलता हासिल गर्न सकेनन् । यस अवधिमा उनले थुप्रै ठूला कलाकारसँग काम गरिन् भने ठूला बजेटका फिल्ममा समेत अभिनय गरिन् । तर, सन् २०१२ मा जस्तो सफलता उनले फेरि दोहोर्‍याउन सकिनन् ।

केही फिल्मले जगाएका थिए आशा

यद्यपि, केही फिल्मले सोनाक्षीको करियरमा आशा जगाएका थिए । सन् २०१४ मा प्रदर्शनमा आएको ‘होलिडे : अ सोल्जर इज नेभर अफ ड्युटी’, सन् २०१९ को ‘दबङ्ग ३’ र मल्टिस्टारर फिल्म ‘मिसन मङ्गल’ सफल भएका थिए । त्यस्तै, सन् २०१३ को ‘आर राजकुमार’ र सन् २०१७ को ‘इत्तेफाक’ले पनि औसतभन्दा राम्रो प्रदर्शन गरेका थिए ।

तर, सन् २०१२ पछि सोनाक्षीका लागि कुनै पनि वर्ष विशेष उपलब्धिमूलक बन्न सकेन ।

विवाहपछि पनि ट्रोलिङको सामना

सोनाक्षी सिन्हा र जहीर इकबालले सात वर्षको प्रेम सम्बन्धपछि सन् २०२४ जुन २३ मा कानुनी विवाह गरेका थिए । घरमै दर्ता गरिएको उक्त विवाहमा परिवारका सदस्य र नजिकका साथीहरू मात्र सहभागी थिए । त्यसपछि उनीहरूले मुम्बईमा भव्य रिसेप्सन आयोजना गरेका थिए ।

तर, विवाहपछि अभिनेत्रीले फरक धर्मका व्यक्तिसँग विवाह गरेको भन्दै सामाजिक सञ्जालमा ट्रोलिङको सामना गर्नुपरेको थियो । यद्यपि, दुवैले यस्ता टिप्पणीलाई बेवास्ता गरे ।

सोनाक्षी सिन्हा अब पति जहीर इकबालसँग फिल्म ‘तू है मेरी किरण’मार्फत दर्शकमाझ आउँदै छिन् । करण रावलले लेखन तथा निर्देशन गरेको यस फिल्ममा जहीर र सोनाक्षी मुख्य भूमिकामा देखिनेछन् । फिल्मको निर्माण सर्वेश गोयल, अश्वनी कुमार, मनोज दराक र नृपाल पटेलले संयुक्त रूपमा गरेका छन् ।

‘तू है मेरी किरण’ सन् २०२६ अक्टोबर २३ मा प्रदर्शनमा आउने तयारीमा छ ।

अब हेर्न बाँकी छ, यो फिल्मले सोनाक्षीको करियरमा नयाँ मोड ल्याउन सक्छ वा सक्दैन । अथवा, विगतका फिल्मजस्तै यो पनि उनको फिल्म सूचीमा अर्को एउटा नाम मात्र थपिनेछ ।