अविश्वास प्रस्ताव राख्ने २१ सांसदको जिकिर- मुख्यमन्त्रीको कामले जनआक्रोश बढ्यो

९ साउन, काठमाडौं । नेपाली कांग्रेसका बागमती प्रदेश सभाका २१ सांसदले मुख्यमन्त्री बहाुदुर सिंह लामा नेतृत्वको सरकारले जनआक्रोश बढाएको हुँदा अविश्वासको प्रस्ताव दर्ता गरेको जिकिर गरेका छन् ।

शुक्रबार संसदीय दलको कार्यालयमा लामाविरुद्ध पेश गरिएको अविश्वास प्रस्तावमा पार्टीको छवि दिनप्रतिदिन कमजोर बनाउन मुख्यमन्त्रीको भूमिकाले काम गरेको आरोप लगाइएको छ ।

सरकारका कामकारबाहीका कारणले प्रदेशप्रति नै जनआक्रोश बढ्दो गतिमा रहेको अविश्वास प्रस्तावमा लेखिएको छ । कांग्रेसको छवि सुधार्नका लागि संसदीय दलको नेता लामा रहेर सम्भव नहुने हुँदा अविश्वासको प्रस्ताव दर्ता गरिएको सांसदहरूले उल्लेख गरेका छन् ।

लामाले उनी संसदीय दलको बैठक यस अवधिमा तीनपटक मात्रै आव्हान गरेको अविश्वास प्रस्तावमा लेखिएको छ । सरकारले प्रदेश सभामा नयाँ विधेयकहरु प्रस्तुत गर्न नसकेका कारणले सदनले विजनेस नपाएको उल्लेख गरिएको छ ।

कांग्रेसको मुख्यमन्त्री र अर्थमन्त्री हुँदा समेत यस आर्थिक वर्षको बजेट विवादमुक्त नभएको अविश्वास प्रस्तावमा लेखिएको छ । ‘सबै घटनाक्रमले माननीय मुख्यमन्त्रीको जिम्मेवारी, प्राथमिकता र जवाफदेहीतामा समेत प्रश्न उठ्न पुगेको छ,’ अविश्वास प्रस्तावमा भनिएको छ ।

बागमती संसदीय दलको कार्यालयमा दर्ता भएको लामाविरुद्धको अविश्वासको प्रस्ताव: