विदेशी नागरिक व्यवस्थापन सूचना प्रणालीमा न्यून सहभागिता, विभागले गरायो सचेत

News Summary

Generated by OK AI. Editorially reviewed.

अध्यागमन विभागले १ जनवरी २०२६ देखि काठमाडौं उपत्यकाका तारे होटलमा विदेशी नागरिक व्यवस्थापन सूचना प्रणाली अनिवार्य गर्ने तयारी गरेको छ।
यो प्रणाली दोस्रो चरणमा २०८२ फागुन १७ देखि विमान कम्पनी, टुर्स एन्ड ट्राभल्स, मनी एक्स्चेञ्जर र सबै होटल तथा सार्वजनिक निजी संस्थामा लागू गरिनेछ।
विभागले प्रणाली कार्यान्वयनको लागि आबद्ध निकायहरूको संख्या न्यून रहेको भन्दै सरोकारवालालाई पुनः सचेत गराएको छ।

७ पुस, काठमाडौं । अध्यागमन विभागले १ जनवरी २०२६ बाट अनिवार्य गर्न लागेको विदेशी नागरिक व्यवस्थापन सूचना प्रणालीमा सहभागिता न्यून भएसँगै सरोकारवालालाई पुनः सचेत गराएको छ । विभागका अनुसार यो प्रणाली पहिलो चरणमा १७ पुस (सन् २०२६ जनवरी १) देखि काठमाडौं उपत्यकाभित्रका तारे होटलमा अनिवार्य गरिँदैछ ।

दोस्रो चरणमा वि.सं. २०८२ फागुन १७ (सन् २०२६ मार्च १) देखि देशभित्रका विमान कम्पनी, टुर्स एन्ड ट्राभल्स कम्पनी, मनी एक्स्चेञ्जरहरुमा र क्रमशः सबै प्रकारका होटल, गेस्ट हाउस तथा अन्य सार्वजनिक, निजी संस्थाका सेवामा लागु गर्ने कार्ययोजना छ ।

प्रणाली कार्यान्वयनको लागि छोटो अवधि मात्र बाँकी रहेको र हालसम्म आबद्ध भएका निकायहरूको संख्या न्यून रहेको देखिएको विभागले उल्लेख गरेको छ । विभागका अनुसार पहिलो चरणमा उपत्यकाका तारे होटेलहरूमा अनिवार्य लागु गर्ने भनिए पनि विदेशी नागरिकलाई सेवा प्रवाह गर्ने सबै सार्वजनिक संस्था एवम् निजी कम्पनी अग्रीम रुपमा यस प्रणालीमा आवद्ध हुन सक्छन् ।

नेपाल भ्रमण गर्ने विदेशी नागरिकको सुरक्षा, सूचनामा सहजीकरण, सम्भावित अपराध नियन्त्रण र नेपालको पर्यटन प्रबद्र्धनमा सहयोग गर्ने उद्देश्यले विदेशी नागरिक व्यवस्थापन सूचना प्रणाली कार्यान्वयनमा ल्याउन लागिएको हो ।