हराएको सिटी सफारीको पाटपुर्जा कवाडी गोदाममा फेला

News Summary

Generated by OK AI. Editorially reviewed.

विराटनगरमा चोरी भएका सिटी सफारीका पार्टपूर्जा कवाडी गोदाममा टुक्राएर बिक्री गर्ने गिरोह सक्रिय रहेको प्रहरीले पत्ता लगाएको छ।
बिहीबार विराटनगर महानगरपालिका–६ सरौचियामा विजय सहनीको कबाडी गोदाममा छापा मार्दा दुई वटा चोरीका सिटी सफारीका पार्टपूर्जा बरामद गरिएको छ।
गोदामका सञ्चालक विजय सहनी फरार छन् र प्रहरीले विराटनगर आसपासबाट चोरी भएका सफारी गोदाममा पुर्‍याउने तथ्य पत्ता लगाएको छ।

२७ चैत, विराटनगर । विराटनगरमा चोरी भएका सिटी सफारीको पार्टपूर्जा कवाडी गोदाममा टुक्राएर बिक्री गर्ने गरेकाे पाइएकाे छ ।

प्रहरी अनुसन्धानका क्रममा चोरी भएका सफारी सिधै प्रयोगमा नल्याई कवाडी गोदाममा टुक्राएर पार्टपुर्जा बिक्री गर्ने गरेको पाइएको हो ।

प्रहरीका अनुसार चोरी र पार्टपुर्जा बिक्री गर्न संगठित गिरोह सक्रिय छ । बिहीबार विराटनगर महानगरपालिका–६ सरौचियामा विजय सहनीले सञ्चालन गरेको कबाडी गोदाममा छापा मार्दा चोरीका दुई वटा सीटी सफारीका विभिन्न पार्टपूर्जा बरामद गरेको थियो । गोदामका सञ्चालक सहनी भने फरार छन् ।

प्रहरीले गोदाममा खानतलासी गर्दा प्लास्टिकजन्य कबाडीका सामानले छोपेर अत्यन्तै सावधानीपूर्वक लुकाइराखिएको अवस्थामा दुईवटा सिटी सफारीका पार्टपुर्जा फेला पारेको मोरङ प्रहरीका सूचना अधिकारी, डीएसपी लीलाराज लामिछाने जानकारी दिए ।

उनका अनुसार विराटनगर र आसपासका क्षेत्रबाट चोरी भएका सफारीहरू गोदाममा पुर्‍याउने गरिएको तथ्य खुलेको छ । घटनाको विषयमा थप अनुसन्धान भइरहेको उनले बताए ।