बाढी प्रभावित क्षेत्रमा नेपाल टेलिकमका १२० टावरमध्ये ९३ पुन: सञ्चालन

News Summary

Generated by OK AI. Editorially reviewed.

नेपाल टेलिकमले बाढी प्रभावित थप सात क्षेत्रमा आज सेवा सुचारु गरेको छ, र प्रभावित १२० साइटमध्ये ९३ साइट सञ्चालनमा आएका छन्।
रसुवाको त्रिशूली थ्रीए जलविद्युत आयोजनासँगैको टावरबाट सेवा सुचारु भएपछि सुरुङमार्गको उद्दार कार्यका लागि सञ्चार सम्पर्क सहज भएको टेलिकमले जनाएको छ।
रसुवाको कालिकास्थान, नुवाकोटको तुप्चे र बुङताङ बीटीएससहित कटुन्जे, सामरी भञ्ज्याङ र बेतिनीका टावर पनि आजदेखि सञ्चालनमा आएका छन्।

१३ भदौ, काठमाडौं । नेपाल टेलिकमले बाढी प्रभावित थप सात क्षेत्रमा आज सेवा सुचारु गरेको छ । यससँगै प्रभावित १२० साइट मध्ये ९३ साइट सञ्चालनमा आएका छन् ।

नेपाल टेलिकमले रसुवाको त्रिशूली थ्रीए जलविद्युत आयोजनासँगै रहेको टावरमार्फत सेवा सुचारु गरेको जनाएको छ । यसबाट उक्त जलविद्युत आयोजनाको सुरुङ मार्गमा भइरहेको उद्दार कार्यका लागि आवश्यक सञ्चार सम्पर्क सहज भएको टेलिकमको भनाइ छ ।

यसका लागि आवश्यक सामग्री सवारी साधनको प्रयोग गरी तथा भरियामार्फत ढुवानी गरिएको थियो ।

रसुवाकै उत्तरगया गाउँपालिकाको कालिकास्थानमा रहेको टावरमार्फत पनि सेवा सुचारु भएको छ । यसैगरी नुवाकोट जिल्लाको तुप्चे र बुङताङ बीटीएस पनि आजैदेखि सञ्चालनमा आएका छन् ।

उक्त टावर सञ्चालनका लागि आवश्यक जेनेरेटर र इन्धन हेलिकप्टरमार्फत ढुवानी गरिएको थियो । यी वाहेक कटुन्जे, सामरी भञ्ज्याङ र बेतिनीका टावर समेत सुचारु भएका छन् ।