चिलिमे हाइड्रोको टनेलबाट ४ शव र एक मानव अंग फेला

News Summary

Generated by OK AI. Editorially reviewed.

चिलिमे जलविद्युत् आयोजनाको टनेलबाट मंगलबार थप चार शव र एक मानव अंग फेला परेको नेपाली सेनाले जनाएको छ।
भदौ १० गतेको बाढीपछि टनेलमा फसेका र सम्पर्कविहीनको खोजीका क्रममा शव तथा अंग नेपाली सेनाको हेलिकप्टरमार्फत त्रिशूली ल्याइएको छ।
चिलिमे आयोजनाले अझै एक जना बेपत्ता रहेको बताउँदै नेपाली सेना, भारतीय सेना, सशस्त्र प्रहरीलगायतको खोजी जारी रहेको जनाएको छ।

३१ भदौ, काठमाडौं । चिलिमे जलविद्युत् आयोजनाको टनेलबाट थप चार जनाको शव र एक मानव अंग फेला परेको छ ।

नेपाली सेनाका अनुसार, टनेलको ‘ब्रेक थ्रु’ गरी अन्तिम किनारासम्म खोजी गर्ने क्रममा मंगलबार चार वटा शव र एक मानव अंग फेला परेको हो ।

फेला परेका शव तथा मानव अंगलाई नेपाली सेनाको हेलिकप्टरमार्फत त्रिशूली ल्याइएको छ । यसअघि भदौ १५ गते पनि टनेलबाट एक शव र एक मानव अंग फेला परेको थियो ।

२२ मेगावाट क्षमताको चिलिमे जलविद्युत आयोजनामा गत भदौ १० गते आएको बाढीका बेला ६ जना कार्यरत रहेको अनुमान गरिएको थियो ।

बाढीका बेला आयोजनाको साइट कार्यालयमा ७१ जना कार्यरत रहेकामा अधिकांश सुरक्षित स्थानतर्फ जान सफल भएका थिए ।

बाढीपछि आयोजनाको टनेलमा फसेका तथा सम्पर्कविहीन भएकाहरूको खोजीका लागि नेपाली सेनासहितका सुरक्षा निकायले उद्धार तथा खोजी अभियान सञ्चालन गर्दै आएका छन् ।

६ जना फसेकोमा अझै १ जना बाँकी रहेको खोजी कार्य जारी रहेको चिलिमे आयोजनाले जनाएको छ ।

नेपाली सेना, भारतीय सेना, सशस्त्र प्रहरी, चिलिमे जलविद्युत् आयोजना, नेपाल विद्युत प्राधिकरण लगायतका सरोकारवाला निकायबाट खोजी कार्य जारी रहेको छ ।