ह्वाट्सएप बिजनेस सेटअपका झन्झटिला काम अब एआई एजेन्टले सम्हाल्ने

३१ भदौ, काठमाडौं । मेटाले एआई एजेन्टमार्फत ह्वाट्सएप बिजनेस अकाउन्ट सेटअप, कन्फिगरेसन र परीक्षण गर्न सकिने नयाँ टुल्स सार्वजनिक गरेको छ।

कम्पनीले ‘ह्वाट्सएप बिजनेस टुल्स एमसीपी’ नामक नयाँ मोडल कन्टेक्स्ट प्रोटोकल (एमसीपी) सर्भर ल्याएको हो। यसले क्लाउड एपीआई प्रयोग गरी ह्वाट्सएप बिजनेस सेवा जोड्नुपर्ने डेभलपरको नियमित सेटअप प्रक्रियालाई सहज बनाउने मेटाको भनाइ छ।

अब डेभलपरले मेटाको डेभलपर कन्सोल, बिजनेस म्यानेजर, एपीआईसम्बन्धी विवरण र कोड एडिटरबीच पटकपटक जानुको सट्टा आफूलाई आवश्यक काम एआई एजेन्टलाई बताएर गराउन सक्नेछन्।

अकाउन्टदेखि फोन नम्बर प्रमाणीकरणसम्म

मेटाका अनुसार नयाँ टुल्सले एआई एजेन्टमार्फत ह्वाट्सएप बिजनेस अकाउन्ट बनाउन, फोन नम्बर थप्न तथा ओटीपीबाट प्रमाणीकरण गर्न सक्नेछ।

यसले फोन नम्बरलाई ह्वाट्सएप क्लाउड एपीआईमा दर्ता गर्न र आवश्यक ह्वाट्सएप सेवा सर्तहरूको अवस्था जाँच गर्न पनि सहयोग गर्नेछ। भुक्तानीको माध्यम थपिएको छ कि छैन, बिजनेस भेरिफिकेसन पूरा भएको छ कि छैन तथा अन्य आवश्यक प्रक्रिया बाँकी छ कि छैन भन्ने जानकारीसमेत एआई एजेन्टले दिनेछ।

कुनै प्रक्रिया पूरा नभएको अवस्थामा त्यसलाई पूरा गर्न आवश्यक लिंक पनि उपलब्ध गराइनेछ।

मेसेज टेम्प्लेट र वेबहुक परीक्षण

नयाँ टुलमार्फत व्यवसायले ग्राहकलाई पठाउने मेसेज टेम्प्लेट बनाउन तथा पहिले तयार गरिएका टेम्प्लेट सम्पादन गर्न सक्नेछन्।

प्रयोगकर्ताले कस्तो सन्देश आवश्यक छ भनेर एआई एजेन्टलाई बताएपछि एजेन्टले त्यसअनुसार टेम्प्लेट तयार गर्न सक्नेछ। टेम्प्लेट स्वीकृत भयो कि भएन भन्ने अवस्था जाँच्न पनि यसले सहयोग गर्नेछ।

यसैगरी, डेभलपरले दर्ता गरिएको नम्बरबाट परीक्षण सन्देश पठाउन, वेबहुकका लागि कलब्याक यूआरएल सेट गर्न र आवश्यक फिल्ड सब्स्क्रिप्सन मिलाउन सक्नेछन्। यसबाट ह्वाट्सएप बिजनेस एकीकरण ठीकसँग काम गरिरहेको छ कि छैन भन्ने परीक्षण गर्न सजिलो हुनेछ।

सुरक्षा र पहुँच नियन्त्रण

मेटाले नयाँ प्रणालीमा प्रमाणीकरण र अनुमतिसम्बन्धी जाँच राखिएको जनाएको छ। प्रयोगकर्ताले ‘फेसबुक लगइन फर बिजनेस’मार्फत लगइन गरी आवश्यक अनुमति दिनुपर्नेछ।

एआई एजेन्टले कुनै काम अघि बढाउनुअघि प्रयोगकर्ता सम्बन्धित एपका एडमिन हुन् कि होइनन्, कुन बिजनेस अकाउन्टसँग जोडिएका छन् र सेवा सर्त स्वीकृत गरिएको छ कि छैन भन्ने जाँच गर्नेछ।

अकाउन्टको अवस्थामै परिवर्तन ल्याउने कामका लागि भने एआई एजेन्टमात्र पर्याप्त नहुने मेटाले जनाएको छ। त्यस्ता कामका लागि मानवीय प्रमाणीकरण आवश्यक पर्नेछ। टुलमार्फत गरिएका सबै कल रेकर्ड गरिने तथा प्रयोगकर्ताको आफ्नै पहुँचअनुसार मात्र विवरण पढ्न सकिने कम्पनीको भनाइ छ।

सबैका लागि तत्काल उपलब्ध छैन

ह्वाट्सएप बिजनेस टुल्स एमसीपी हाल चरणबद्ध रूपमा उपलब्ध गराइँदै छ। यो सुविधा अहिले सबै डेभलपरका लागि खुला भइसकेको छैन।

यो टुल क्लाउड, कोडेक्स, च्याटजीपीटी र कर्सर जस्ता एआई कोडिङसँग प्रयोग गर्न सकिने बताइएको छ।

हालका लागि यसको मुख्य उद्देश्य विकास र परीक्षण हो। ठूलो परिमाणमा उत्पादनस्तरको ह्वाट्सएप सन्देश सञ्चालन गर्ने पूर्ण समाधानका रूपमा भने मेटाले यसलाई प्रस्तुत गरेको छैन।

मेटाको यो नयाँ कदमले एआई एजेन्टलाई कोड लेख्ने काममा मात्र सीमित नराखी अकाउन्ट सेटअप, सेवा कन्फिगरेसन र प्रणाली परीक्षणजस्ता व्यावहारिक काममा समेत प्रयोग गर्ने दिशातर्फ अघि बढाएको बताइएको छ।