राष्ट्रसंघमा नेतान्याहुले सम्बोधन गर्दा प्रतिनिधिहरूले हल छाडे

९ असोज, काठमाडौं ।  इजरायली प्रधानमन्त्री बेन्जामिन नेतान्याहुले संयुक्त राष्ट्रसंघको महासभामा इरान, गाजा र मध्यपूर्वका अन्य क्षेत्रमा इजरायलले गरिरहेको सैन्य कारबाहीको कडा बचाउ गरेका छन्।

उनी मञ्चमा उक्लनेबित्तिकै दर्जनौँ देशका प्रतिनिधिहरूले विरोधस्वरूप हल छाडेर बाहिरिएका थिए। प्रतिनिधिहरू बाहिरिएपछि नेतान्याहुले भने, ‘हामीले जित्नेछौँ। हामीसँग अर्को कुनै विकल्प छैन।’ 

उनले थपे, ‘यदि हल नछाडेका अन्य कुनै नैतिक काँतर यहाँ छन् भने, कृपया अहिले नै बाहिर जानुस्।’ यसका साथै, उनले इजरायलले गाजामा नरसंहार गरिरहेको भन्ने आरोपलाई पनि खारेज गरे।

अब्बासले भने- ‘गाजामा नरसंहार भइरहेको छ’ 

यसअघि प्यालेस्टिनी राष्ट्रपति महमुद अब्बासले भिडियो सन्देशमार्फत सम्बोधन गर्दै इजरायली नीतिहरूले प्यालेस्टिनी जनताको भूमि र अस्तित्वमै खतरा निम्त्याएको बताएका थिए। अमेरिकाले भिसा दिन अस्वीकार गरेपछि उनले भिडियो लिङ्कमार्फत सम्बोधन गरेका हुन्।

अब्बासले वेस्ट ब्याङ्कमा भइरहेको अवैध यहुदी बस्ती विस्तारले ‘दुई-राष्ट्र समाधान’ लाई जोखिममा पारेको बताए। उनले गाजामा इजरायली सेनाले ‘हत्या, विनाश, भोकमरी र विस्थापनका साथै नरसंहारको युद्ध’ गरिरहेको आरोप लगाए।

आलोचक र एर्दोगानमाथि प्रहार 

युद्ध अपराधको आरोपमा अन्तर्राष्ट्रिय फौजदारी अदालतको पक्राउ पुर्जी झेलिरहेका नेतान्याहुले आफ्ना आलोचक देश र नेताहरूमाथि कडा प्रहार गरे। बेलायत र फ्रान्सतर्फ लक्षित गर्दै उनले भने, ‘उनीहरू सानो इजरायललाई उपनिवेशवादको आरोप लगाउँछन्। भगवान्‌को कसम, यो शब्द उनीहरू आफैँले आविष्कार गरेका हुन्।’

उनले टर्कीका राष्ट्रपति रेसेप तैयप एर्दोगानलाई हमासलाई समर्थन गरेको भन्दै तानाशाहको सङ्ज्ञा दिए। यसअघि मंगलबार एर्दोगानले गाजा र वेस्ट ब्याङ्कमा भइरहेको अन्यायले ‘मानवताको अन्तस्करणमा गहिरो चोट’ पुर्‍याएको बताएका थिए।

न्युयोर्कका मेयरको आलोचना र ट्रम्पको प्रशंसा 

नेतान्याहुले न्युयोर्क सहरका वामपन्थी मेयर जोहरान मामदानीको पनि आलोचना गरे। नेतान्याहुले भने, ‘तपाईं यो सहरको मेयर निर्वाचित भएदेखि धेरै यहुदीहरूले न्युयोर्कमा सुरक्षित महसुस गर्न छाडेका छन्।’ 

यसअघि नेतान्याहुलाई पक्राउ गर्ने चेतावनी दिएका मामदानीको कार्यालयले भने नेतान्याहुले आफ्नो नरसंहारलाई ढाकछोप गर्न ‘आधारहीन झुट’ बोलेको प्रतिक्रिया दिएको छ।

यस्तै, नेतान्याहुले गत फेब्रुअरीमा इरानमाथि संयुक्त हवाई आक्रमण गरेकोमा अमेरिकी राष्ट्रपति डोनाल्ड ट्रम्पको ‘साहसिक नेतृत्व’ को प्रशंसा गरे। 

उनले भने, ‘इजरायल र अमेरिकाले आफूलाई बचाउन मात्र होइन, सभ्यता बचाउन सँगै काम गरे।’

न्युयोर्कमा प्रदर्शन, ओस्कार विजेता अभिनेत्री पक्राउ 

नेतान्याहुको भ्रमणको विरोधमा न्युयोर्कमा प्रदर्शन गर्ने कैयौँलाई हिरासतमा लिइएको छ। पक्राउ पर्नेमा ओस्कार विजेता अभिनेत्री सुसन सारान्डन र एमी विजेता अभिनेत्री हन्ना आइनबिन्डर पनि रहेका छन्।

७ अक्टोबर २०२३ मा हमासले इजरायलमा आक्रमण गर्दा करिब १,२०० जनाको मृत्यु भएको थियो भने २५१ जनालाई बन्धक बनाइएको थियो।

त्यसयता इजरायली सैन्य कारबाहीमा गाजामा ७३,९२० भन्दा बढी मानिस मारिएको हमास-नियन्त्रित स्वास्थ्य मन्त्रालयले जनाएको छ।

गत वर्ष विश्वका प्रमुख जेनोसाइड स्कोलर्सले राष्ट्रसंघीय महासन्धिअनुसार इजरायलले गाजामा ‘नरसंहार’ गरिरहेको घोषणा गरेका थिए। तर, इजरायलले यसलाई अस्वीकार गर्दै यो कारबाही आत्मरक्षाका लागि भएको बताउँदै आएको छ।

गत फेब्रुअरी २८ मा, इरानले गोप्य रूपमा आणविक हतियार बनाइरहेको आशङ्कामा इजरायल र अमेरिकाले इरानमाथि भारी हवाई आक्रमण सुरु गरेका थिए। त्यसको जवाफमा इरानले इजरायल र अमेरिकी सैन्य अखडा रहेका खाडी देशहरूमा मिसाइल र ड्रोन आक्रमण गरेको थियो।

(बीबीसीबाट)