यसरी हुँदैछ बेनी–जोमसोम–कोरला सडक मर्मत

२० असोज, म्याग्दी । पछिल्लो मनसुनजन्य विपद्पछि बाढीपहिरोका कारण क्षतविक्षत बनेको चीन र भारत जोड्ने कालीगण्डकी करिडोरअन्तर्गतको बेनी–जोमसोम–कोरला सडकको म्याग्दी खण्डमा मर्मत धमाधम भइरहेको छ।

पर्वतको कुश्मा नगरपालिका–१ पाङदेखि म्याग्दीको बेनी हुँदै चीनको सीमामा रहेको कोरला नाका जोड्ने २०२ किलोमिटर दूरीको यो सडक असोज दोस्रो साताको वर्षापछिको बाढीपहिरोले ५० भन्दा बढी ठाउँमा अवरुद्ध बनेको थियो। दश ठाउँमा कालीगण्डकीले सडक कटान गरेर बगाएको र भत्काएको छ।

बेनी–जोमसोम–कोरला सडक योजनाका प्रमुख तेजस्वी शर्माले आगामी सोमबारसम्म सवारीसाधन सञ्चालन गर्न सकिने गरी म्याग्दीको रघुगङ्गा गाउँपालिका–२ कुनौटादेखि अन्नपूर्ण गाउँपालिकाको केन्द्र पोखरेबगरसम्मको करिब १२ किलोमिटर सडक मर्मत भइरहेको बताए। ‘वर्षा रोकिनेबित्तिकै असोज १२ गतेदेखि नै कोरला नाकातर्फबाट म्याग्दीको भुरुङ–तातोपानीसम्म दुई दिनमै मर्मत गरेका थियौँ,’ उनले भने, ‘मालढुङ्गातर्फबाट बेनी–बैसरी हुँदै कुनौटासम्मको करिब २५ किलोमिटर सडक सोमबार साँझसम्म मर्मत सकिएको छ।’

कुनौटामा कालीगण्डकी नदीको बाढीले करिब २५० मिटर सडक कटान गरेको छ। सडक कटानपछि पैदल आवतजावतसमेत कठिन बनेको कुनौटो क्षेत्र मर्मतका लागि चुनौतीपूर्ण मानिएको छ।

सुरुआती चरणमा रघुगङ्गा गाउँपालिका–३ तिल्केनीचौरस्थित राहुघाट जलविद्युत् आयोजनाको विद्युत्गृह परिसरमा कटान भएको सडकको विकल्पमा नयाँ मार्ग बनाउन र इन्धन व्यवस्थापन गर्न चुनौती थियो।

राहुघाटको विद्युत्गृह अगाडि सडक मार्ग खुलाउने काम सकिएको, नेपाली सेना, स्वयंसेवक र ड्रोनको सहायताले ढुवानी तथा सापटी मागेर इन्धन व्यवस्थापन गरिएकाले अहिले समस्या नरहेको आयोजनाले जनाएको छ। ‘कुनौटाभन्दा माथि सडक मर्मतका लागि आवश्यक इन्धन मानिसले बोकेर लैजान सम्भव नभएपछि सोमबार नेपाली सेनाको टोली र ड्रोनको सहायतामा पहिरो तारेर इन्धन पुर्‍याएका छौँ,’ आयोजना प्रमुख शर्माले भने, ‘छ पटकको उडानबाट ४०० लिटर डिजेल कटान क्षेत्र पार गराइएपछि कुनौटाभन्दा माथि पनि सडक मर्मतमा सहज भएको छ।’

अन्नपूर्ण गाउँपालिकाको पोखरेबगर र रातोपानीमा सडकको नयाँ ट्र्याक खोल्ने तथा महभिर र भिरकाटे खण्डमा पनि काम भइरहेको छ। अन्नपूर्ण गाउँपालिका–६ रातोपानीमा दुई ठाउँमा गरी करिब २५० मिटर सडक कटान भएको स्थानमा नयाँ ट्र्याक खोलिएको छ। पोखरेबगरस्थित कालीगण्डकी पुलको पहुँचमार्ग निर्माणमा मजदुर परिचालन भएका छन्।

सडक विभाग र निर्माण व्यवसायीका १५ वटा स्काभेटर, १२ वटा टिपर र १५ वटा लोडरसहित जनशक्ति परिचालन गरेर सडक निर्माणको कामलाई तीव्रता दिइएको सङ्घीय सडक सुपरीवेक्षण आयोजना पोखराका प्रमुख नरेन्द्र सुवेदीले बताए। ‘सडक विभाग र निर्माण कम्पनीले अवरुद्ध सडक खुलाउन सबै ठाउँमा समानान्तर रूपमा काम गरिरहेका छन्,’ उनले भने, ‘यसै साताभित्र सडक मर्मत सम्पन्न गर्ने लक्ष्यसहित काम भइरहेको छ।’

रसुवा र तातोपानी नाका बन्द रहेकाले चीनसँगको व्यापारका लागि कोरला नाका महत्वपूर्ण बनेको उनले बताए। कोरला नाका जोड्ने सडकलाई छिटो सञ्चालनमा ल्याउन सरकारले उच्च प्राथमिकताका साथ काम गरिरहेको उनको भनाइ छ।

मुस्ताङको स्याउ बजार पठाउने समय पनि सुरु भएको छ। दसैँ–तिहारका लागि भेडाच्याङ्ग्रा बजार झार्ने समय नजिकिएको छ। पर्यटकीय यामसमेत सुरु भएकाले बेनी–जोमसोम सडक छिटो सञ्चालनमा ल्याउन दबाब बढेको छ।